भांगरभूंय | प्रतिनिधी
कोल्हापूर: ज्येश्ठ साहित्यीक, विद्रोही सांस्कृतीक चळवळीचे पुरस्कर्ते प्रा. राजा शिरगुप्पे (64) हे काल (मंगळारा) कोल्हापूरांत संवसाराक अंतरले. तांचे फाटल्यान घरकान्न प्रा. मीना शिरगुप्पे, चित्रकार पूत रोहन, धूव अनुजा, सून असो घराबो आसा.
शिरगुप्पे हांणी कथा, कविता, सिनेमा, नाटक, रस्तोनाट्य, समिक्षा, संशोधनाचेर लेखन ह्या मळार आपली म्होर उमठायल्या. निपाणीतल्या कामगार चळवळींतल्यान ते समाजकारणांत सक्रीय जाल्ले. समाजवेवस्था बदला खातीर लेखणी हे मोटें शस्त्र आसा हाचेर तांणी आयुश्यभर लेखन केलें. विद्रोही सांस्कृतीक चळवळी सयत प्रगतशील अशा चळवळींनी तांचो सक्रीय वांटो आशिल्लो. विद्रोही सांस्कृतीक चळवळीच्या सांगलीत जाल्ल्या संमेलनाचे ते अध्यक्ष आशिल्ले.
‘साधना’ सातोळ्याचें लेखक अशीय प्रा. राजा शिरगुप्पे हांची वळख निर्माण जाल्ली. तांच्या भोंवडीचेर आदारीत लेखनाक लागून ते नामनेक पाविल्ले. खूबशा राज्यांनी भोंवडी करून तांणी केल्लें लेखन ‘साधना’ सातोळ्यांत तशेंच हेर नियतकालिकांतल्यान उजवाडा आयलां. तांची पुस्तकांय आयल्यांत. तांची कांय पुस्तकां विद्यापिठाच्या अभ्यासक्रमां खातिरूय आसात. कांय पुस्तकांचो हिंदी भाशेंतल्यो आवृत्योय उजवाडा आयल्यात.
शिरगुप्पे हांणी ल्हान भुरग्यां खातिरूय लेखन केलां. फक्त महाराष्ट्रच न्हय जाल्यार देशभर तांचो इश्ट परिवार आसा. तांकां आयिल्ल्या मरणाक लागून चळवळीचें मोटें लुकसाण जालां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
