भांगरभूंय | प्रतिनिधी
वास्को: सासमोळें- बायणांत मलेरियाचो दुयेंती सांपडिल्ल्यान वास्को शार भलायकी केंद्रान त्या वाठारांतल्या लोकांच्या रगताचे नमुने एकठांय केले. थंय वखदांची फवारणी केली. जळारांक धांवडावन घालपा खातीर रातच्या वेळार धुंवर सोडटात. फाटल्या कांय म्हयन्यांत हांगा मलेरियाच्या दुयेंतींची नोंद जावंक नाशिल्ली. पूण आतां मलेरियाचो दुयेंती तीन-चार दिसां पयलीं सांपडिल्ल्यान शार भलायकी केंद्रान थंय खबरदारीचे उपाय हातांत घेतल्यात.
सदर मनीस दुयेंत आशिल्ल्यान उपचारा खातीर चिखली उपजिल्हो हॉस्पिटलांत गेल्लो. थंय रगताचे तपासणे उपरांत त्या मनशाक मलेरिया जाल्ल्याचें उक्तडार आयलें. हे संबंदी शार भलायकी केंद्राक कळयले उपरांत तांणी रोखडींच पावलां उबारलीं.
मजगतीं, आपल्या वाठारांत मलेरियाचो दुयेंती सांपडिल्ल्याचें समजतकच थंयच्या रहिवाशां मदीं भिरांत पातळ्ळ्या. ज्या मनशाक मलेरियाची लागण जाल्या तो वास्को शारा भायल्या गृहनिर्माण प्रकल्पांत कामाक वता. थंय त्या मनशाक मलेरियाचें जळार चाबिल्लें आसूंक जाय असो अदमास उक्तायतात.
मजगतीं, तो मनीस जंय रावता, थंयच्या व्हाळांत व्हड प्रमाणांत घाण उदक सोडटात. थंयचें घाण उदक पंपींग स्थानकांतलो पंप नादुरुस्त जालो वा थंय व्हड प्रमाणांत घाण उदक एकठांय जायत जाल्यार तें घाण उदक थंयच्या व्हाळांत बिनधास्तपणान सोडटात असो दावो थंयच्या रहिवाशांनी केला.
ह्या प्रकरणाची थळव्या लोकप्रतिनिधीक म्हायती दिवन लेगीत कांयच उपेग नाशिल्ल्याचें कांय जाणांनी सांगलें. ह्या प्रकरणांत मुरगांव पालिका, भलायकी खात्यान लक्ष घालपाची गरज थळाव्या रहिवाशांनी उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
