भांगरभूंय | प्रतिनिधी
ग्रामसभांनी रोमी कोंकणीक तेंको
भांगरभूंय । प्रतिनिधी
मडगांवः दक्षीण गोंयांत सनबर्नाक जावपी विरोध अजून कायम आसा. हो महोत्सव फक्त ड्रग्स महोत्सव आशिल्ल्याचें सांगून दक्षीण गोंयांतल्यान सनबर्नाक आतां ग्रामसभांतल्यानूय विरोध जाता. आयतारा बेताळभाटी, वार्का, नुवें, कामुर्ली, सारझोरा, कार्मोणें ह्या ग्रामसभांतल्यान सनबर्न महोत्सवाक विरोध आशिल्ल्याची भुमिका लोकांनी घेतली आनी तसो थाराव संमत केले.
सनबर्न महोत्सव उत्तर गोंयांतल्यान दक्षीण गोंयांत येतलो अशें कळटाच आनी आयोजकांनी तशें सोशल मिडियाचेर जाहीर करताच आतां दक्षीण गोंयांतल्या विवीध पंचायतीं कडल्यान विरोधाक सुरवात जाल्या. सनबर्न हो फक्त संगीत महोत्सव न्हय जाल्यार ड्रग्ज महोत्सव आशिल्ल्याचें सांगून युवा पिळगेक मारक थारपी महोत्लवा आड आंदोलनाची तयारी लेगीत लोकांनी दाखयल्या. आमदार क्रूज सिल्वा हांचे हाजिरेंत दक्षीण गोंय जिल्होधिकारी अश्वीन चंद्रू हांकां निवेदन सादर करून संगीत महोत्सवाक परवानगी दिवची न्हय, तशेंच परवानगी घेनासतना तिकेट विक्री केल्ल्या प्रकरणांत गुन्यांव नोंद करपाची मागणी केल्ली.
हे आदीं स पंचायतीं कडल्यान थाराव
कुडटरी ग्रामसभेंत सनबर्नाच्या विशयाचेर चर्चा जावन ताका विरोध जाल्लो. ते उपरांत आयतारा बाणावलेच्या विशेश ग्रामसभेंत लोकांनी हार वयर करून सनबर्न महोत्सव दक्षीण गोंयांत आयोजीत करचो न्हय, अश्या थारावाक संमती दिली. तशेंच तळावली, वेळ्ळी, चांदर ह्या ग्रामसभांनी लेलगीत लोकांनी एकवटींत सनबर्ना आड थाराव संमत केलो. जाल्यार आंबेली ग्रामसभेंत लेगीत सनबर्नाचो विशय आयलो तेनान संगीत महोत्सवाक विरोध ना, पूण त्या संगीत महोत्सवाच्या नांवा खाला जावपी ड्रग्स आनी हेर अवैध वेवसायांक लागून युवा पिळगेक धोको आशिल्ल्याचें सांगून सनबर्न विरोधांत थाराव संमत केलो.
वार्का रोमी कोंकणीक तेंको
रोमी कोंकणी लिपयेक अधिकृत भाशेचो दर्जो दिवपाचो थाराव घेतलो. देवनागरी कोंकणी लिपये वरपींच रोमी लिपयेक तिचो हक्क मेळपाची गरज आसा. वार्का ग्रामसभेंत अॅनिमल बर्थ कंट्रोल समिती स्थापन केली. हे समितींत सरपंच, भलायकी अधिकारी, पशू वैजकी विभागाचे अधिकारी, गोवा सोसायटी फॉर प्रिव्हेंशन ऑफ क्युअॅलिटी टू अॅनिमलाचे वांगडी आनी गांवांतले एके व्यक्तीचो आस्पाव केला.
गांवांत रस्ताद सुण्यांचें प्रमाण वाडलां. ते प्रमाण ताचेर आळाबंद हाडचे खातीर उपाय येवजण करपाक लसीकरण आनी निर्बिजीकरणाचेर भर दिवपाचें थारायलें.
नुव्यां सनबर्ना आड थाराव
नुवेंचे ग्रामसभेंत लेगीत ड्रग्स, सोरो, शिंदळकी वेवसाय ह्या कारणां खातीर सनबर्न हो महोत्सव वळखतात. दक्षीण गोंयांत ह्या महोत्सवाक लागून युवा पिळगेचें लुकसाण जातलें. ताका लागून ह्या महोत्सवाक सगळ्यांच्या मतान विरोध आशिल्ल्याचो थाराव घेतलो. तशेंच रोमी कोंकणी लिपयेक अधिकृत भाशेचो दर्जो मेळचो, असोय थाराव घेतलो.
गांवांतल्या रस्ताद सुण्यांचो विशय चर्चेक आयलो. ताचेर उपाय येवजण करपाची मागणी जाली. गांवांतल्या शेतांनी हुंवाराचें उदक आयिल्ल्यान लुकसाण जालां. शेतकी खात्या कडल्यान तत्काळ पळोवणी करची, खूबश्यो जमनी मातयेचो भराव घालून पुरोवपाचे प्रकार बंद करचे. गोंया भायल्या लोकांचे वसतींक लागून रस्त्याचेर कोयर उडोवपाचे प्रकार घडटात, तांकां वळखपत्रां दिवचीं, वांगड्यांचे संख्ये प्रमाण कर घेवचो, हे संबंदांत थाराव घेतले.
बेताळभाटीच्या लोकांकूय नाका सनबर्न
सनबर्न सारकिल्ल्या इलॅक्ट्रॉनीक्स डान्स म्युझीक महोत्सवाक लागून ड्रग्राचो वेव्हार चलता, आवाजाचें प्रदुशण जाता. त्या काळांत नातलां आशिल्ल्यान येरादारीची कोंयडी जावपाचे प्रकार वाडटले. युवा पिळगेक वेसनां पासून पयस दवरचे खातीर सनबर्न महोत्सवाक विरोध आशिल्ल्याची भुमिका बेताळभाटीच्या लोकांनी घेतली आनी सनबर्न दक्षीण गोंयांत नाका, असो थाराव घेतलो.
सारझोरा, चिंचोणें, कामुर्ली, कार्मोण्यां लेगीत सनबर्नाक विरोध
साश्टींतल्या चिंचोणें, कामुर्ली, कार्मोणें आनी सारझोराच्या ग्रामसभांतल्यान सनबर्न महोत्सव दक्षीण गोंयांत नाका अशें सांगून लोकांनी सनबर्ना आड थाराव संमत केले.
चिंचोणें ग्रामसभेंत रोमी कोंकणीक अधिकृत भाशेचो दर्जो मेळपाची मागणी केली आनी परतून परतून वीज पुरवण बंद जाता हे खातीर वीज खात्या कडेन पत्रवेव्हार करपाची मागणी केली. हो सभेंत सरपंच वालेंतिनो बार्रेटो हांणी हे आदीं थारिल्ले प्रमाण पदाचो राजिनामो दिता, अशी घोशणा केली.
सारझोरा ग्रामसभेंत रोमी कोंकणीक अधिकृत लिपयेचो दर्जो दिवपाचे मागणे सयत रस्त्यांचें रुंदीकरण, परतूव परतून खंडीत जावपी वीज पुरवणे सयत एमआरएफ शेड उबारपाचो प्रस्न चर्चेक आयलो, अशें लिओना फर्नांडीस हांणी सांगलें.
कामुर्ले वीज खंडीत जावपाचो प्रस्न सोडोवपा सयत कनिश्ठ अभियंतो मेळोवचे खातीर खात्या कडेन पत्रवेव्हार करपाचें थारायलें. कार्मोणें पंचायती कडल्यान सनबर्नाक विरोध जाल्यार रोमी कोंकणी लिपयेक अधिकृत भाशेचो दर्जो मेळोवपाची मागणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
