भांगरभूंय | प्रतिनिधी
172 दुयेंती; 7 हॉस्पिसियोंत, 12 गोमॅकाँत
भांगरभूंय । प्रतिनिधी
मडगांवः कुटबण आनी मोबोर जेटीचेर सुमार 172 दुयेंती सांपडल्यात. तातूंतल्या 33 जाणांचेर उपचार चालू आसात. दक्षीण गोंय जिल्हो हॉस्पिटलांत 7 आनी गोंय वैजकी म्हाविद्यालयाच्या हॉस्पिटलांत 12 दुयेंती उपचार घेतात. कॉलेराची धाम पातळ्ळे उपरांत अचकीत 30 ते 35 दुयेंती एकेच खेपे सांपडूंक लागले. ताका लागून उपचार दिवचे खातीर गरजेची ती सगळी उपाय येवजण केल्या. स्वतंत्र शौचालयां उबारल्यांत आनी दिसांतल्यान 6 खेपे नितळसाण करतात, अशें डॉ. उत्कर्ष बेतोडकार हांणी सांगलें.
दुयेंतींक नितळ वातावरणांत दवरतात. भलायकी खात्या कडल्यान कॉलेरा आडावचे खातीर गरजेच्यो उपाय येवजण हातांत घेतल्या. सध्या दुयेंतींची संख्या उणी जाता, पूण एकाद्या ट्रॉलराचेर दुयेंती आसल्यार दुयेंतीची संख्या वाडपाक लेगीत शकता. ताका लागून सध्यातरी परिस्थिती नियंत्रणांत आसा, अशें म्हणपाक शकना, अशेंय डॉ. बेतोडकार हांणी सांगलें. जिल्होधिकारी कार्यालयांतले बसके उपरांत डॉ. बेतोडकार उलयताले. तांणी सांगलें, कॉलेराची धाम खंयच्यान पातळपाक सुरवात जाली ताची नेमकी म्हायती ना. पूण वाठारांत आनी खाजगी शौचालयांत नितळसाण राखली ना जाल्यार ओकारी आनी परसा कडेन जावपाक सुरवात जाता. कॉलेरा जाल्यार वेळार उपचाराची गरज आसता. आतां मेरेन मरण आयिल्ल्या कामगारांच्या कुडींतल्या उदकाचें प्रमाण उणें जाल्ल्याचें दिसून आयलें. ताका लागून बोटी वयल्या कामगारांक ओआरएस सयत हेर वखदांय दितात. हे खातीर कुडींतलें उदक वेवस्थीत उरपाक मजत मेळूं येता आनी उपचारा खातीर तांकां परतून दर्यादेगेर हाडपाक शकतात. बाळ्ळी भलायकी केंद्रा कडल्यान योग्य त्यो सुचोवण्यो, जनजागृती आनी जतनाय घेतात, अशें तांणी सांगलें.
ट्रॉलरांचेर आसूं येतात दुयेंतीः डॉ. बेतोडकार
कुटबण आनी मोबोर ह्या जेटी वाठारांत सध्या 172 कॉलेराचे दुयेंती आसात. दर्यांत आशिल्ल्या ट्रॉलरांचेर कांय दुयेंती सांपडपाक शकतात. ते खातीर परिस्थिती नियंत्रणांत आसा, अशें म्हणपाक जावचें ना. मात सगळे तरेची जतनाय घेतात, अशें डॉ. उत्कर्ष बेतोडकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
