भांगरभूंय | प्रतिनिधी
पणजीः सावरगाळ धारबांदोडेंच्या सोमनाथ इंग्लीश हायस्कुलांत गुरू पुनव म्हळ्यारच व्यास पौर्णिमा तरेकवार कार्यावळी वरवीं व्हड उर्बे उमेदीन मनयली.
शिक्षिका शिला हांच्या मार्गदर्शना खाला विद्यार्थ्यांनी गायिल्ल्या सुंदर अशा प्रार्थनेन कार्यावळीची सुरवात जाली. मुख्याध्यापिका प्रज्वला बखले हाणी महर्षी व्यासमुनींच्या फोटवाक फुलां हार घाले उपरांत विद्यार्थ्यांनी हायस्कुलाच्या शिक्षकांक तशेंच शिक्षकेतर कर्मचाऱ्यांक फुलांतुरे भेटोवन तांचो भोवमान केलो.
ह्या वेळार मुख्याध्यापिका बखले हांणी विद्यार्थ्यांचे जिणेंत व्यास पौर्णिमेचें म्हत्व सांगपी उलोवप केलें. कार्यावळींत आयशा वेळीप हें विद्यार्थिनीन गुरू पुनवेचेर सोबीत कविता सादर केली, जाल्यार शालमली नायक आनी शमिका नायक हांणी पदां गायलीं. श्रिशा सावंत देसाय, तृशाली आनी अनुश्का गांवकार हांची गुरू पुनवेच्या म्हत्वाचेर उलोवपां जालीं.
काव्या सावंत देसाय आनी वन्मई गांवकार हांणी शिक्षिका तनया रिवणकार हांच्या मार्गदर्शना खाला गुरू शिश्याचें नातें सांगपी पुराणांतल्यो काणयो सांगल्यो. तेचपरीं शिक्षिका शर्मिला गांवकार हांणी बसयिल्लें व्यास मुनींचेर आदारीत नाटकुलें यत्ता णववी ब वर्गांतल्या विद्यार्थ्यांनी सादर केलें.
ही गुरू पुनवेची कार्यावळ सवी यत्तेच्या भुरग्यांनी शिक्षक दर्शन हरमलकार हांच्या मार्गदर्शना खाला घडोवन हाडली.
कार्यावळीच्या शेवटाक दिव्यांश गांवकार हाणी कार्यावळीक हाजीर आशिल्ल्या नागरीक, पालक तशेंच आदले विद्यार्थी हांचे उपकार आठयले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
