भांगरभूंय | प्रतिनिधी
सुदैवान दुचाकी चालक वाटावलो; येरादारी कांय वेळ ठप्प
सावयवेरें: सावयवेरें ते माशेल ह्या मुखेल रस्त्यार सावय रस्त्या कुशीक दुरगा भितर आशिल्ल्या चिंचेच्या झाडाचो एक मोटो खांदो मुखेल रस्त्यार चलते दुचाकीचेर कोसळ्ळो. पूण सुदैवान दुचाकी चालक वाटावलो. ही घडणूक काल (बिरेस्तारा) सकाळीं 10.30 वरांच्या सुमाराक घडली.
मेळिल्ले म्हायती प्रमाण सकाळीं 10.30 वरांच्या सुमाराक पावस, वारो, वादळ नासून लेगीत केआरएसएस हायस्कुला मुखार सुमार 200 मिटर अंतराचेर सावय वाठारांत मुखेल रस्त्यार चिंचेच्या झाडाचो खांदो अचकीत तुटून दुचाकीचेर कोसळ्ळो. दुचाकी चालकाक खांदो पडटलो हाची कल्पना लेगीत नाशिल्ली. हो दुचाकी चालक सावयवेरें सावन माशेलांत वतालो. ताणें हॅल्मेट घाल्ल्यान सुदैवान ताका कसलीच खर जखम जावंक नाशिल्ल्याचें समजता.
ताच्या दुचाकीचें मात कांय प्रमाणांत लुकसाण जालें. हो खांदो विजेच्या सरयांचेर कोसळिल्ल्यान वीज सरयांचेंय लुकसाण जालां. काल वीज खात्या वतीन सावयवेरें फिडराचेर दुरुस्तीचें काम सुरू आशिल्ल्यान सावयवेरें आनी वळवय वाठारांत वीज पुरवण खंडीत आशिल्ली. नाजाल्यार खूब मोटो अनर्थ घडपाची शक्यताय आशिल्ली.
थळाव्यांनी खांदो पडिल्ल्याचें कळटकूच तांणी रोखडीच घडणूक थळार वचून दुचाकी आनी दुचाकी चालकाक भायर काडलो. दुचाकी चालकाक किरकोळ दुखापत जाल्ल्याचें थळाव्यांनी सांगलें. खांदो पडिल्ल्यान रस्तो कांय वेळ येरादारी खातीर ठप्प जाल्लो.
वीज खात्याच्या कर्मचाऱ्यांनी ताकतिकेन घडणूक थळार धांव घेतली. थळावे आनी वीज खात्याच्या कर्मचाऱ्यांनी रस्तो येरादारी खातीर मेकळो केलो. हे घडणुकेची म्हायती उजो पालोवपी दळाक मेळटकूच दळाचे जवान घडणूक थळार दाखल जाले, आनी तांणी खांदो कापून कुशीक काडलो आनी रस्तो येरादारी खातीर मेकळो केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
