भांगरभूंय | प्रतिनिधी
केरी- सत्तरीः उपक्रमशील विद्यालय म्हूण नांव जोडिल्लें पुनर्वसन साळांतलें सरकारी मुळाव्या विद्यालयान कोरोना म्हामारी काळांत वसयिल्ल्या नक्षत्र वनाक उजो लागिल्ल्यान सगळीं झाडां आनी रोंपे हुलपून गेले.
विद्यालयान 27 राशी- नक्षत्रांच्या झाडां प्रमाण शाळेच्या प्राकारांत वाटकुळ्या आकारांत विवीध तरांचीं 27 झाडां लायिल्लीं. सुमार एक फूट उंचायेची लायिल्ले रोंपे ह्या 3-4 वर्सां वाडून 5-6 फूट उंच जाल्ले. पूण चार दिसां आदीं विद्यालयाच्या वाठारांत लागिल्ल्या उज्याक लागून ते पुराय हुलपून गेले.
चार दिसां आदीं ह्या विद्यालयाच्या वाठारांत दनपारच्या पारार उजो पातळ्ळो आनी तो नक्षत्र वनांत पावलो. ह्या उज्यांत सुमार 100 झाडां हुलपलीं. सध्या विद्यालयाचें दुरुस्तीकाम सुरू आशिल्ल्यान विद्यालयाचे वर्ग थंयच्यान सुमार 700 मिटर अंतराचेर एके खाजकी कुडींत चलतात. त्या वेळार थंय शिक्षक संकेत नायक आशिल्ले. उज्याची खबर मेळटाच ते तशेंच कांय पालक घडणुकेचे सुवातेर वचून उजो पालयलो. पूण ते मेरेन नक्षत्र वनाचो गोबर जाल्लो.
नक्षत्र वनांत 15 मिटर व्यासाच्या वाटकुळे सुवातेंत दरेके राशींचें एक झाड लायिल्लें. हीं झाडां थळावे लोकप्रतिनिधी, पर्यारवण मोगी- अभ्यासक, समाज वावुरपी, पालक- विद्यार्थ्यांनी लायिल्ली. त्या झाडांची जतनाय घेवपाची जापसालदारकी दत्तक येवजणे खाला भुरग्यांक दत्तक दिल्लीं. ते प्रमाण विद्यार्थी तांचो सांबाळ करताले.
ह्या रानांत वड, पिंपळ, औदुंबर, सातीण, खैर, शमी, सीता अशोक, पारिजात, कडूलिंब, बेल, बांबू, अर्जून, आंबो, रुई, बेत, सायलो, जामळ, कोकण, परणस शिसम, पेर, आवळो, धूप, बदाम, जाई, जुई, पायर, कल्पवृक्ष अशीं झाडां लायिल्लीं.
—
हुलपिल्लीं झाडां वाटावपाचो चल्ला यत्न उज्यांत हुलपिल्लीं कांय झाडां परतून जगपाची आस्त बाळगून तांकां वाटोवपाचे विद्यालया वतीन खर यत्न चल्ल्यात. फाटले दोन दीस विद्यार्थी आपापल्या घरा कडल्यान 1- 2 लिटर उदक घेवन येतात आनी विद्यालयाची प्रार्थना जाले उपरांत त्या झाडांक उदक घालतात. भुरग्यां वांगडा पालक संजय सावंत, शंकर म्हापसेकार, वासुदेव गंवस, प्रभारी मुख्याध्यापक धाकटू पाटील, शिक्षक संकेत नायक, शिक्षिका स्मिता राऊळ रोप्यांक जिवदान दिवचे खातीर उदक घालतात.
ठंबक उदक सिंचन वेवस्था लासून गोबर
नक्षत्र वनांतल्या झाडांक ठिंबक उदक सिंचन वेवस्थे वरवीं उदक दिवपाची प्रक्रिया चालीक लायिल्ली. हे खाला दरेका झाडाक दर दिसा आठ लिटर उदक दिताले. पूण उज्याक ते वेवस्थेची प्लास्टीक पायपलायनीचो लासून गोबर जालो. ताका लागून अर्थीक लुकसाणे वांगडाच झाडांक उदक दिवपाची वेवस्था लेगीत बंद जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
