भांगरभूंय | प्रतिनिधी
पणजी ः साश्ट तालुक्यांतली एक मुखेल न्हंय आनी एका काळार जीवनदायिनी आशिल्ली साळ न्हंयेची स्थिती बाबत जाल्या. ही न्हंय घाणयारें उदक व्हरपी गटार जाल्या. इतिहासीक आनी पर्यावरणाचे नदरेन म्हत्वाची आशिल्ले हे न्हंयेचे स्थितीक लागून जायत्या जाणांक अडचणी येवपाक लागल्या.
ही न्हंय प्रदुशणा पसून वाटावची म्हूण वेर्णा आनी भोंवतणच्या वाठारांतले थळावे लोक एकठांय आयल्यात. तांणी सरकारा कडेन आवाहन केलां. पर्यावरण संचालनालय, गोंय राज्य प्रदुशण नियंत्रण मंडळ, जलसंपदा विभाग ह्या सरकारी खात्या कडेन संपर्क सादून न्हंयेचो सैमीक प्रवाह परतून हाडचो अशी मागणी केल्या.
सरकारी खात्यांक बरयल्ल्या पत्रवेव्हारांत म्हणलां, साळ न्हंयेची पर्यावरणीय भलायकी तिगोवन दवरपाचेर लक्ष दिवचें. तशेंच सैमीक प्रवाह सुरळीत करपाचेरुय मागणी केल्या. घाणयारे उदक, कोयर, नुस्त्याच्या बाजारांतलो कोयर अशा गजालींक लागून न्हंयेचे उदक व्हड प्रमाणांत प्रदुशीत जाला. साळ न्हंय आनी तिच्या उपन्हंयांची स्थिती बाबत जाल्या. वेर्णा गांवांतल्यान सुरू जाल्ली ही न्हंय अरबी दर्यामेरेन पाव मेरेन प्रदुशणाचें केंद्र जावन आसा.
हाका लागून पुराय उदकाचो स्त्रोत प्रदुशीत जावपाक लागला. म्हामार्गाक लागून कांय कडेन न्हंयच्या सैमीक प्रवाहाक आडमेळीं निर्माण जाल्यांत. वेर्णाच्या थळाव्यांनी दक्षीण गोंय जिल्होधिकारी, गोंय मानवी हक्क आयोग, पर्यावरण संचालनालय, गोंय राज्य प्रदुशण नियंत्रण मंडळ, जलसंपदा विभाग, गोंय राज्य कोयर वेवस्थापन प्राधिकरण आनी संबंदीत सरकारी खात्यांक पत्र बरोवन साळ न्हंय वाटावपा खातीर बेगोबेग पावलां उबारपाची मागणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
