भांगरभूंय | प्रतिनिधी
भांगरभूंय । प्रतिनिधी
मडगांवः साळ न्हंयेंतलो चिकोल काडपाचें काम सध्या सुरू आसा. मात तें सारकें जायना अशें न्हंयचे देगेर रावपी नुस्तेंमारी आनी हेर लोकांनी सांगलां. ताका लागून कॅप्टन ऑफ पोर्ट आनी रानां खाताच्या अधिकाऱ्यांनी आमदार क्रुझ सिल्वा वांगडा कामाची पळोवणी केली. न्हंयंतलो चिकोल कांदळीं झाडांट उडयल्ल्याचें दिसून आयलें. आमदारान ह्या प्रकरणात बेगोबेग कारवाय करपाची मागणी केल्या.
सध्या असोळणे हांगा चिकोल काडपाचें काम चल्लां. कांय कडेन चिकोल काडून देगेर वडयला. ताका लागून न्हंयचें ड्रेजिंग करून कसलोच फायदो जावचो ना अशें नुस्तेमाऱ्यांनी सांगलें. न्हयचे देगेर कांदळीचीं झाडां वाडल्यांत. व्हडीं व्हरतना तांची आडखळ येता. तशेंच पावसाच्या दिसांनी न्हंयचें उदक पात्रां भायर येवपाची भिरांत तांणी उक्तायल्या.
साळ न्हंयतलो चिकोल काडपाचें काम करपी कंत्राटदार सारकें काम करना अशी लोकांची कागाळ आसा. चिकोल पयस व्हरून वडपाचे सुवातेर तो न्हंयचे देगेर उडयला. पावसाच्या दिसांनी तो परत न्हंयेत वतलो आनी केल्लो सगलो खर्च फुकट वतलो अशें आमदार सिल्वान सागून कंत्राटदाराचेर कारवाय करपाक कॅप्टन ऑफ पोर्टाक सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
