भांगरभूंय | प्रतिनिधी
सुभाष फळदेसायः 32 कोटी खर्चाच्या प्रकल्पाची पीपीपी तत्वाचेर निर्मिती
भांगरभूंय । प्रतिनिधी
सांगें: साळावलेच्या बोटनिकल गार्डनांत सुमार 32 कोटी रुपया खर्च अपेङीत आशिल्ल्या वेलनेस सेंटराची पीपीपी तत्वाचेर उबारणी करतले, अशें सांगेंचे आमदार तशेंच समाज कल्याण मंत्री सुभाष फळदेसाय हांणी सांगलें. साळावले बोटनिकल गार्डन तशेंच मनरिजवण पार्काक तांणी भेट दिवन थंय चालू आशिल्ल्या कामाची पळोवणी करून नियाळ घेतलो. त्या वेळार ते उलयताले.
वट्ट 5.45 हॅक्टर जमनीर हें वेलनेस सेंटर उबारपाचो रान विकास म्हामंडळाचो विचार आसा. पयल्या घटकांत रिसेपशन ब्लॉक, स्विमींग पूल, सौना आनी एक्सओटीक मसाज केंद्र, खानावळ, कॉटेजीस, योगा सेंटर, नॅचर वॉक आनी रिव्हर ट्रेल हांचो आस्पाव आसा. फुडल्या घटकांत पार्कींग लॉट आनी एट्रन्स प्लाझाचो आस्पाव आसा.
मंत्री फळदेसाय हांचे वांगडा जिल्हो पंचायत वांगडी सुरेश केपेंकार, खासा अधिकारी परेश कुंकळ्येकार हाजीर आशिल्ले. सध्या थंय व्हड प्रमाणार शाळेचे विद्यार्थी पिकनिके खातीर येतात. बोटनिकल गार्डन ही एक उत्कृश्ट पिकनिकेची सुवात जाल्या. मंत्री फळदेसाय हांणी पुराय गार्डन भोंवून पळयलें. तशेंच थंयच्या अधिकाऱ्यांक गरजेच्यो सुचोवण्यो केल्यो. सोबेच्या झाडांची योग्य जतनाय घेवपाक सांगलें. हालींच निर्माण केल्ल्या वखदी हर्बल गार्डनाक लेगीत तांणी भेट दिली. तशेंच इकॉ कॉटेजीची पळोवणी केली. गार्डनांत आनिकूय खूबश्यो सोयीसुविधा निर्माण जावपाची गरज आसा. खूबश्या प्रस्तावांचेर विचार चल्ला, अशें तांणी सांगलें.
गार्डनाक भेट दिवपी पर्यटकांक रावपा खातीर तीन इकॉ फ्रेंडली कुटिरां आसात. ताचो पर्यटकांनी लाव घेवप गरजेचें आसा. तशेंच धरण वाठारांत हेर कॉटेजी आसात. आनीक नव्यान कॉटेजी बांदतले. गार्डनांल्यान व्हांवपी न्हंये पलतडच्या वाठारांत नव्यान वखदी हर्बल गार्डन बांदलां. थंय खूबश्या वखदी झाडां लायल्यांत. तशेंच तणाट्यो ल्हान खोंपी लेगीत बांदल्यात. थंय मनरिजवणेच्यो तशेंच हेर सुविदा निर्माण करतले. तातूंत उदकाचे कारंजे, टॉय ट्रेन, उक्ती माची हांचो आस्पाव आसा, अशें मंत्री फळदेसाय हांणी सांगलें. बोटनिकल गार्डनाक भेट दिवपी पर्यटकां खातीर शीतपेय म्हूण थळावीं ताजीं आडसरां उपलब्ध करात अशी सुचोवणी मंत्री फळदेसाय हांणी ह्या वेळार केली. गार्डनांत खानावळीची वेवस्था आसा, पूण ताचो दर्जो वाडोवपाची गरज आसा. गार्डनांत प्रवेशा खातीर जाण्ट्यांक 60 रुपया जाल्यार भुरग्यांक 30 रुपया प्रवेश शुल्क घेतात. सध्या पिकनिके खातीर ही सुवात खुबूच फामाद आसा. शेनवारा, आयतारा वा सुटयेच्या दिसा थंय खूब गर्दी सता. ह्या गार्डनाचे प्रभारी म्हूण रान अधिकारी अभिषेक नायक कारभार सांबाळटात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
