भांगरभूंय | प्रतिनिधी
मॉन्सून फुडें गेल्ल्यान परिणाम; खारजांतलें उदक केलें बंद
भांगरभूंय । प्रतिनिधी
सांगें: साळवली धरणाच्या उदकाची पुराय दक्षीण गोंयांत तशेंच कांय प्रमाणांत उत्तर गोंयांत पुरवण करतात. अंदूं पावस फुडें धुकलिल्ल्यान ह्या धरणाचें उदक आटलां आनी दुकळ पडपाची शक्यताय उप्रासल्या.
अंदूं मॉन्सून पावपाक कळाव जाला. आनीक कांय दीस मॉन्सून फुडें धुकल्लो जाल्यार पुराय गोंयांत उदकाचो उणाव जावपाक शकता. म्हैसाळ धरण आटल्यार सुमार म्हयनो जायत आयला. ताका लागून ह्या उदकाचेर निंबून आशिल्ल्या लोकांची स्थिती गंभीर जाल्या. आतां साळावली धरणाचें उदक आटलें जाल्यार पुराय गोंयांत उदकाचो उणाव जावपाक शकता. सध्या साळावली धरणांतल्या उदकाची पातळी 29.18 मिटर आसा, पोरूं ह्याच दिसांनी 32.62 मिटर आशिल्ली. अंदूं साडेतीन मिटर उदक आटलां. उदक आटपा खातीर शिंपणावळ खातें जापसालदार आसा, अशें लोकांचें म्हणणें आसा. वर्सा परस अंदूं 15 दीस आदींच खारजांत उदक सोडिल्लें. तें उदक 16 जूनाक बंद केलां. तशेंच धरणांतलें उदक कालें न्हंयेक सोडिल्लें, तें आठ दिसां आदीं बंद केलां. खरें म्हणल्यार तें हाचे आदीं बंद करपाक जाय आशिल्लें. तशें केल्लें जाल्यार उदकाची पातळी इतली देंवची नाशिल्ली, अशें लोकांचें म्हणणें आसा.
म्हयनोभर उदक पावतलें: जेसन मिनेझीस
साळावली धरणांतल्या उदकाची पातळी अंदूं खूब देंवल्या. पूण धरणांत आशिल्लो सांठो म्हयनोभर पावपाक शकता. पावसान अंदूं कळाव केला. ह्या म्हयन्यांत पावस पडलो ना जाल्यार लोकांक त्रास जवं येता. धरणांत उदक उणें आशिल्ल्यान 16 जूनाच्यान खारजांत सोडिल्लें उदक बंद केलां, अशें अभियंते जेसन मिनेझीस हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
