साळांत गडे उत्सवाची तयारी नेटान

भांगरभूंय | प्रतिनिधी

गडेमंडळ, देवस्थान समितीची जाली बसका

दिवचल: दिवचल म्हालांतल्या साळ गांवचे लोक गडेत्सव मनोवपाक तयारेक लागले. ती दीस मनोवपी गड्यांक कांय दीस उरल्यात. ताका लागून पुराय गांव ह्या उत्सवाची नेटान तयारी करतना दिसता. हो उत्सव मंगळार ता. 7 ते 9 मार्च मेरेन मनयतले. हाचेर चर्चा करपा खातीर देवस्थानाचे अध्यक्ष कालिदास रावत हांचे अध्यक्षतेखाला भुमिका मंदिराच्या सभामंडपांत बसका जाली. हे बसकेंत विवीध विशयांचेर चर्चा जाली. 

उत्सवाची तयारी सध्या सुरू आशिल्ल्यान गडेमंडळ, देवस्थान समितीचे अध्यक्ष कालिदास रावत, सचीव विशाल परब आनी हेर वांगड्यांच्या मार्गदर्शना खाला मंडळां, संस्था, समाजसेवक आनी ग्रामस्थांनी उत्सव येसस्वी करपा खातीर आनी येवपी भाविकांक सगळे तरेच्यो सुविधा दिवपा खातीर तयारी सुरू केल्या. 

गडेमंडळ, देवस्थान मंडळ आनी ग्रामपंचायतीच्या वतीन श्री महादेव मंदिराच्या आंगणांतलो वाठार नितळ दवरपाक 3 मार्च सावन सुरवात जाल्या. ग्रामस्थांनी आपल्या घरा फुडल्या आंगणांत माडाच्या चुडटांनी पारंपरीक मंडप उबारपाक सुरवात केल्या. तशेंच भाविकांचीं वाहनां योग्य सुवातेर उबीं करपाक पार्कींग व्यवस्थेचो विचार करप चालू आसा. देवळाचे भोंवतणचें सोबितीकरण निमाण्यां पांवड्यार आशिल्ल्यान पार्कींग वेवस्था बरे तरेन जावपाक विवीध सुवातांचो सोद घेवप सुरू आसा. 

बायलां भाविकांक बसपा खातीर होळीच्या वाठारांत व्हड आनी सोबीत मंडप घालतले. तशेंच तिरसोळी हांगचो व्हाळ पार करपाक पायप, मातयेची रास घालून रस्तो तयार केला. तशेंच उजवडी (मशाल) पळोवपाक आडखळ येवची न्हय देखून व्हाळाच्या कुशीक आशिल्लीं झाडां झोपां कापपाक सुरू केलां, अशें कालिदास रावत, अशोक परब हांणी सांगलें. 

गडे उत्सव ज्या वाठारांत मनयतात थंय गड्यां मजगतीं लायट वचची न्हय देखून तिनूय रातचे  वीज खात्याचे कर्मचारी हाजीर रावचे अशी मागणी केल्या.

  गडे उत्सवांत येवपी विवीध दुकानां कशीं मांडपाचीं हाचेर सध्या विचार चालू आसा. दुकानां मेजून जागे दिवपाचेर विचार चालू आसा. भाविकांक मशाल पळोवपाक वतना योग्य रस्तो आसचो हाची दखल देवस्थान मंडळ घेता. विवीध दुकानां घालपा खातीर जागो आरक्षीत करपाक देवस्थानाचे अध्यक्ष कालिदास रावत (9373595505) आनी सचीव विशाल परब (8411982121), अशोक परब (9850546938/8390307338) हांचे कडेन संपर्क करचो अशें कळयलां. 

ह्या वेळार देवस्थानाचे अध्यक्ष कालिदास रावत, सचीव विशाल परब, पंढरीनाथ रावत, सदाशिव गाडगीळ, राजू रावत, प्रमोद रावत, सदा रावत, निलेश परब, प्रकाश रावत, देव रावत, सगूण रावत, सुरेश परब, दीपक रावत, यशवंत रावत, उमेश रावत, विजयानंद रावत, मुकूंद परब, संजय परब, शैलेश रावत, शैलेश रावत, दत्ताराम रावत, विश्वनाथ परब, दत्ताराम परब, गुरूनाथ रावत, अजय रावत, रवी रावत, रमेश परब, वासुदेव परब, सचिन रावत, उत्तम रावत, शांबा घुरे, पांडुरंग परब, सुरेश रावत आनी हेर हाजीर आशिल्ले.