भांगरभूंय | प्रतिनिधी
सांगें: नेत्रावळी रानजीव अभयारण्यांतल्या साळजिणी रानांत कासाक गेल्ल्या कदंब म्हामंडळाच्या 16 कर्मचाऱ्यांक रान खात्याच्या अधिकाऱ्यांनी ताब्यांत घेतिल्ले. तांचे कडल्यान काडतुसां सयत कुराड, कोयतो, जेवण करपा खातीर लागपी साहित्य जप्त केल्लें. जर ते कासाक गेल्ल्या लोकां कडल्यान हें साहित्य मेळ्ळें जाल्यार तांचे कडलें आर्म खंय गेलें? दोग जाण पळून गेल्ले अजून कित्याक सांपडनात? तांणी कास केलें काय ना? कास केली जाल्यार मास खंय गेलें? असो दुबाव लोक उक्तायतात.
कदंब म्हामंडळाचे सोळा कर्मचारी शेनवारा रातीं 9.30 वरांच्या सुमाराक टप्प्याटप्प्यान नेत्रावळी अभयारण्यांतल्या साळजिणी रानांत वताले. तेन्ना थंयच्या सिक्युरिटींनी तांकां तेन्नाच कित्याक आडायले ना? काय कोणाच्या सांगण्या वेल्यान तांकां सोडले अशेय प्रस्न लोक विचारूंक लागल्यात.
ते दोंगरार गेले उपरांत तांचो फाटलाग जाता. तांकां धरतात मात तांचे कडलें आर्म मात गायब जाता हें नाटक हेतुपुरस्सर बी केलें ना मूं? नाजाल्यार कासाक गेल्ल्यांचो नक्कीच ‘गॉडफादर’ बी आसतलो. तेच बरोबर तांणी येदें व्हडलें कृत्य करून लेगीत एका दिसांत जामीन मेळ्ळो कसो? असो दुबाव लोक उक्तावंक लागल्यात.
कर्मचाऱ्यांक पांच दीस चवकशे खातीर हजर रावपाचो आदेश न्यायालयान दिला आनी जे सुवातेत कासाक गेल्ले ते सुवातेंत एक म्हयनो वचपाक बंदी घाल्या. ह्या प्रकरणा कडेन रानां मंत्री, कदंब म्हामंडळाचे अध्यक्ष हांणी लक्ष घालपाची मागणी लोकांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
