भांगरभूंय | प्रतिनिधी
भांगरभूंय । प्रतिनिधी
अस्नोडेंः साळ हांच्या महादेव भूमिका देवस्थानाचो वर्सुकी दिवजोत्सव फाटल्या मंगळाराक रातयां उमेदीन जालो. साळ वाठारांतल्या जायत्यो सुवासिनी पारंपरीक पद्दतीन णववारी साडयो, माथ्यार आबोली आनी शेवत्या फुलांचे वळेसर आनी दागिने घालून दिवजोत्सवांत वांटेकार जाल्ल्यो. देवस्थान समितीचो अध्यक्ष कालिदास राऊत आनी सचीव विशाल परब हांणी सगले वेवस्थेचेर नदर दवोरल्ली.
रातयां 8 वरांचेर दिवजोत्सवाक सुरवात जाली. पुरयत सदाशीव गाडगीळ हाणे गाराणे घातलें आनी दिवजांक सुरवात जाली. सगळ्यांत फुडें परंपरे प्रमाण पुरयत आनी ताच्या फाटल्यान सुवासिनीनी भूमिका देवळांतल्यान महादेव मंदिरांक फेरी मारली. निमाणे ढोल- ताश्यांचा गजरांत भूमिका देवळाक पांच प्रदक्षिणा घातल्यो. सुवासिनींक प्रसाद म्हणून गोड फोव वाटले. दिवजांत परंपरे प्रमाण सदाशीव गाडगीळ, यशवंत गाडगीळ, तशेंच राऊत, परब, घुरे आनी नायक (भाजे), घाडी, च्यारी आनी परवार घराबांतल्यो सुवासिनींनी वांटो घेतिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
