भांगरभूंय | प्रतिनिधी
म्हापशें, प्रतिनिधी ः साळगांव पुलिसांनी धनवाड्यार धाड घालून 2.80 लाखांचें 280 ग्राम चरस जप्त करुन दुबावीत दिनेश कुमार (30, हिमाचल प्रदेश) हाका अटक केली.
ही कारवाय बिरेस्तारा 26 तारखेर रातच्या 11.08 ते शुक्रारा 27 तारखेर दनपारां 2.20 वरां मजगतीं साळगांव पुलिसांनी केली. साळगांवच्या धनवाडो हांगाच्या फिल्ड साईड बार लागसार ड्रग्स तस्करीचो वेव्हार चालू आशिल्ल्याची म्हायती सुत्रां कडल्यान पुलिसांक मेळ्ळी. ते प्रमाण पुलिसांनी घडणुकेच्या थळार सांपळो घालून दुबाविताक ताब्यांत घेतलो. उपरांत ताची तपासणी केली तेन्ना ताचे कडेन 2.80 लाखांचें 280 ग्राम चरस सांपडलो.
पुलिसांनी अमली पदार्थ नियंत्रण कायद्या खाला गुन्यांव नोंद करून दुबाविताक अटक केली. मजगतीं, दुबावीत आरोपी दिनेश कुमार बिरेस्तारा 26 तारखेर ड्रग्स तस्करीच्या हेतान रेल्वेंतल्यान गोंयांत आयिल्लो अशें पुलिसांच्या चवकशेंतल्यान स्पश्ट जालां.
पुलीस निरिक्षक सोमनाथ माजिक हांच्या फुडारपणा खाला उपनिरिक्षक अक्षय गांवकार, दिशन नायक, कॉन्सटेबल श्रीकृष्ण रेडकार, राहुल आंगोलकार, विनोद कासार आनी तुळशीदास गावस हांणी ही कामगिरी केली. पुलीस अधीक्षक अक्षत कौशल आनी उपअधीक्षक विश्वेश कर्पे हांच्या फुडारपणा खाला पुलीस फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
