भांगरभूंय | प्रतिनिधी
पर्वरी: बिंदिया भगवंत नायक हांची साल्वादोर दु मूंदच्या सरपंचपदार विरोधा विणें निवड.
आदली सरपंच रोशनी सावयकार हांणी सरपंच पदाचो राजिनामो दिल्ल्यान हें पद रितें आशिल्लें. ताका लागून म्हापशेंच्या गटविकास अधिकार्यान सोमार २४ जून दिसा सकाळीं १० वरांचेर सालय पंचायत कार्यालयांत नवो सरपंच वेंचून काडपाक विशेश बसका आपयल्ली. फकत पांच पंच वांगडी हाजीर आशिल्ले. रोशनी सावयकार, नम्रता विजय चोडणकार, राजेश सावयकार, कृष्णाकांत चोडणकार, बिंदिया भगवंत नायक हे ह्या वेळार हाजीर आशिल्ले. हेर चार पंच वांगडी संदीप साळगांवकार, रिना फर्नांडीस, विजय दळवी आनी दत्तराम रेडकार हे बसकेक हजर रावूंक ना.
गटविकास कार्यालय म्हापशेंचे विस्तार अधिकारी खुशाली हळर्णकार हांणी हे वेंचणुकेचें संचालन केलें. पंचायत सचीव ज्ञानेश खोर्जुवेंकार हांणी तांकां सहकार्य केलें. साल्वादोन दु मुंदच्या सरपंचपदा खातीर बिंदिया भगवंत नायक हांचो एकूच अर्ज आयिल्ल्यान तांची विरोधा विणें निवड जाल्ल्याचें जाहीर केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.