भांगरभूंय | प्रतिनिधी
वाळपयः वाळपय- होंडा मार्गार सालेली वाठारांत दुचाकीन (जीए 04 पी 6055) फातराच्या दुरगाक धपको दिल्ल्यान हेदोडें सत्तरीचो नेहाल उल्हास गावडे (22) हाका मरण आयलें.
हो अपघात बिरेस्तारा सांजेच्या 7 वरांच्या सुमाराक जालो. जखमी नेहाल गावडे हाका वाळपयच्या सरकारी समाजीक हॉस्पिटलांत उपचारा खातीर व्हरतना वाटेर ताका मरण आयलें. रस्त्यार आशिल्ल्यो म्हशी ताका दिसूंक नाशिल्ल्यान हो अपघात जाल्ल्याची म्हायती थळाव्या लोकांनी दिली.
मेळिल्ले म्हायती प्रमाण नेहाल दुचाकी वयल्यान होंडाच्यान वाळपय वतालो. सालेली रस्त्यार आशिल्ल्यो म्हशी ताका दिसूंक नाशिल्ल्यान ताचो गाडये वयलो ताबो गेलो आनी दावे वटेन आशिल्ल्या फातराच्या दुरगाक दुचाकीचो धपको बसलो. ह्या अपघातांत ताचे तकलेक गंभीर जखम जाली. थळाव्यांनी ताका ताकतिकेन 108 सेवे वरवीं वाळपयच्या सरकारी समाजीक हॉस्पिटलांत दाखल करपाचो यत्न केलो. मात हॉस्पिटलांत पावचे आदींच ताका मरण आयलें.
नेहाल हो पणजेच्या पासपोर्ट कार्यालयांत हालींच कामाक लागिल्लो. दर दिसा तो दुचाकी वयल्यान कामाक वतालो. मेळिल्ले म्हायती प्रमाण अपघाता वेळार नेहालान हॅल्मेट घालूंक नाशिल्लें. तें दुचाकीच्या फाटल्यान लावन दवरिल्लें, अशें थंय आशिल्ल्यांनी सांगलें.
वाळपय पुलिसांनी अपघाताचो पंचनामो केलो. नेहाल हाचे कुडीचेर शुक्रारा सकाळीं पोस्टमार्टम करतले आनी ते उपरांत ताची कूड ताच्या घरच्यांचे सुवादीन दितले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
