भांगरभूंय | प्रतिनिधी
-मोटारींतल्यान उडी मारिल्ल्यान आवय आनी चलो वाटावलो
दिवचलः सारमानस- पिळगांवां फेरी धक्क्याचेर ड्रायव्हरान व्हेगनआर गाडी सरळ उदकांत घातिल्ल्यान घसघसो यतीन महादेव मयेंकार (29) हाका मरण आयलें. गाडयेंत आशिल्ल्या पर्यटक बायलेन आपल्या चल्या सयत गाडयेंतल्यान उडी घेतिल्ल्यान तांचो जीव वांचलो. गाडी चलोवपी यतीन हाका काळजाचो आताक आयिल्ल्यान ताचे गाडये वयलें नियंत्रण गेलें असो मुळावो अदमास आसा. पोस्ट मॉर्टेमा उपरांत हो अपघात जावपाचें कारण स्पश्ट जातलें अशें पुलिसांनी सांगलें.
ही घडणूक मंगळार 28 नोव्हेंबराक सांजे 6.30 वराच्या सुमाराक घडली. मेळिल्ले म्हायती प्रमाण यतीन मयेंकार हो जीए 06 डी 9472 ही मारुती व्हेगनआर ही गाडी घेवन मुंबयचो अमीत कोरगांवकार, ताची घरकान्न यशश्री कोरगांवकार आनी चलो अयान कोरगांवकार (12) हांकां करमळी रेल्वे स्टेशऩार सोडपाक घेवन वतालो. सारमानस हांगा फेरी धक्क्याचेर चारचाकी गाडयांची गर्दी आशिल्ली. रेल्वे स्टेशनाचेर वेळार पावप गरजेचें आशिल्ल्यान अमीत कोरगांवकार सकल देंवन रांकेंत ताच्या फुडें आशिल्ल्या गाडयांक तांची गाडी फुडें व्हरपाक विनवणी करपाक लागलो. त्या वेळार यतीन ड्रायव्हर सीटार पडलो आनी गाडी देंवते वयल्यान सकयल वचपाक लागली. यशश्रीन प्रसंग पळोवन गाडयेचें दार उक्तें करून चल्या सयत भायर उडी मारली. आनी तितले म्हणसर गाडी सरळ उदकांत गेली.
धक्क्या कडेन आशिल्ल्या लोकांनी यतीनाक गाडयेंतल्या भायर काडलो. ह्या अपघाताक लागून फेरी धक्क्यार व्हडलो बोवाळ जालो. निखील वरगांवकार (सारमानस), पांडुरंग कुंडयकार, लक्ष्मीकांत भामयकार, नारायण कवळेंकार (माठवाडो- पिळगांव) हांणी उदकांत वचून उदकांत गेल्ल्या गाडयेचो ड्रायव्हर यतीन मयेंकाराक भायर काडलो. मात तागेली कसलीच हालचाल जायनाशिल्ली. यशश्री कोरगांवकार ही नर्स आशिल्ल्यान तिणे ताची नाडी पळयली.
हे घडणुकेक लागून सारमानस ते सान्तइस्तेव फेरीसेवा बंद पडली. फेरीधक्क्या खाला गाडी आशिल्ल्यान फेरी व्हरपाक मेळनाशिल्ली. रातयां 8 वरांच्या सुमाराक व्हेगनआर गाडी दिवचलच्या उजो पालोवपी दलाच्या जवानांनी उदका भायर काडली. दिवचल पुलिसांनी अपघाताचो पंचनामो केलो. उजो पालोवपी दलाचो अधिकारी शिवाजी नायक आनी ताच्या पंगडान मजत काम केले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
