भांगरभूंय | प्रतिनिधी
नवी दिल्ली, खबरां संस्था ः दर वर्सा देशांत सायबर गुन्यांवांचे प्रकरणांत बरीच वाड जायत आसा. दर दिसा सायबर गुन्यांवकार लोकांची वैयक्तीक म्हायतीं वापरुन बँक खातें हॅक करतात. दर दिसा नवीन नवीन पद्दती वापरुन सायबर गुन्यांवांची जायती प्रकरणा घडतात. पूण आमी कांय गजालींची जतनाय घेतल्यार तातूंतल्यान स्वताक वाचवंक शकता.
प्रधानमंत्री नरेंद्र मोदी हांणी अंदूंच्या वर्साचे सुरवेक मायक्रोसॉफ्टचे सहसंस्थापक बिल गेट्स हांचे कडेन जाल्ले भेटे विशीं आनी सायबर सुरक्षा प्रस्नाचेर केल्ले चर्चे विशीं सांगलें. प्रधानमंत्रीच्या बसके उपरांत मंत्रीमंडळ सचीवान सगल्या मंत्रालयांक लेखी सुचोवण्यो दिल्यात. अहवाला प्रमाण ‘मंत्रालयाक तांच्यो आयटी प्रणाली सुलभ करपा खातीर आनी सायबर सुरक्षा मार्गदर्शक तत्वां आनी प्रोटोकॉलांक खर पाळो दिवपा खातीर अधिकाऱ्यांक संवेदनशील करपाक पावलां उबारपाचे निर्देश दिल्यात.’
प्रधानमंत्री नरेंद्र मोदी हांणी हालींच एका बसकेंत मंत्रालयाच्या अधिकाऱ्यांक सायबर सुरक्षा विशींचो कांय म्हत्वाच्यो टिप्स सांगल्यात. खबरा प्रमाण प्रधानमंत्री मोदी हांणी सांगलें, दीसाच्या शेवटाक आपल्या सिस्टमांतल्यान लॉग ऑफ केला काय हें पळयात. कारण हांव तशेंच करता. सायबर सुरक्षा खातीर हें म्हत्वाचें जावन आसा.
दरेका कार्यालयांतल्या एका मनशाक दीस सोंपतकच भोंवपाक नेमून सगळे सिस्टम लॉग आउट जाल्यात हाची खात्री करूं येता अशेंय प्रधानमंत्री मोदी हांणी सांगलें. कारण सिस्टम लॉग इन दवरप धोक्याचे थारूंक शकता आनी हाका लागून सायबर फटवणूक जावं शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
