भांगरभूंय | प्रतिनिधी
देशभरांत 2023 वर्सा वट्ट 11.28 लाख अर्थीक सायबर फटवणूक
नवी दिल्ली, खबरां संस्था ः देशांत सायबर गुन्यांवांची प्रकरणां सतत वाडत आसात. ते प्रमाण 2023 वर्सा वट्ट 11.28 लाख अर्थीक सायबर फटवणूक जाल्यात. देशांत सगळ्यांत चड सायबर फटवणूक गुन्यांव उत्तर प्रदेशांत नोंद जाल्यात. तेच बरोबर महाराष्ट्र दुसरे सुवातेर आसा. अर्थीक फटवणूकेची कागाळ करपा खातीर गृह मंत्रालयान ‘इंडियन सायबर क्राइम कोऑर्डिनेशन सेंटर’ खाला ‘सिटिझन फायनान्शियल सायबर फ्रॉड रिपोर्टिंग अँड मॅनेजमेंट सिस्टम’ स्थापन केल्या.
फाटल्या 2023 वर्सा अर्द्या परस चड अर्थीक सायबर फटवणूक प्रकरणां फकत पांच राज्यांतल्यान नोंद जाल्लीं. सुमार 2 लाख प्रकरणां सयत उत्तर प्रदेश पयल्या क्रमांकाचेर आसा. हाचे उपरांत 1 लाख 30 हजार महाराष्ट्र, 1 लाख 20 हजार गुजरात, राजस्थान आनी हरियाणातल्यान दरेकीं सुमार 80 हजार प्रकरणा नोंद जाल्यात. तेच बरोबर सायबर फटवणुकेच्या मळार लक्षद्वीप 29 प्रकरणां सयत निमाण्या क्रमांकाचेर आसा.
सायबर फटवणूक जाल्ल्यान फाटल्या वर्सा भारतीयांक 7,488.6 कोटी रुपया लुकसाण जालें. महाराष्ट्र 990.7 कोटी रुपयांचें लुकसाण सयत फुडें आसा आनी उपरांत तेलंगणाक 759.1 कोटी रुपयांचें लुकसाण जालां. तेच बरोबर उत्तर प्रदेश (721.1कोटी), तामिळनाडू (661.2 कोटी), कर्नाटक (662.1 कोटी) आनी गुजरात (650.5 कोटी) ह्या हेर राज्यांकय व्हड अर्थीक लुकसाण जालें.
लोकसभेंत दिल्ले जापेंत ‘सिटिझन फायनान्शिअल सायबर फ्रॉड रिपोर्टिंग अँड मॅनेजमेंट सिस्टम’ सुरू जाले उपरांत 4.7 लाखां परस चड कागाळी आयल्यो तांतूतल्यान 1200 कोटी रुपयांची बचत जाली. पुलिसांनी नोंद केल्ले 3 लाख 20 हजार सिम कार्ड आनी 49 हजार इंटरनॅशनल मोबाइल इक्विपमेंट आयडेंटिटी (IMEI) क्रमांक सरकारान ब्लॉक केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
