सायबर फटवणुकीचो तपास करपाक ई- झीरो एफआयआर उपक्रम

भांगरभूंय | प्रतिनिधी

पणजीः गृह खात्याच्या भारतीय सायबर गुन्यांव समन्वय केंद्रान (आयफोरसी) तपास बेगीन करुन गुन्यांवकारांक धरपा खातीर नवो ई-झीरो एफआयआर उपक्रम सुरू केला.
ही नवी प्रणाली राष्ट्रीय सायबर क्रायम रिपोर्टींग पोर्टल (एनसीआरपी) वा 1930 ह्या हेल्पलायनीचेर नोंद जाल्ल्या 10 लाख रुपयां परस चड सायबर अर्थीक गुन्यांवांचें रुपांतर आपोआप एफआयआरांत करतले. केंद्रीय गृहमंत्री अमित शाह हांणी ही म्हायती सोशल मिडिया प्लॅटफॉर्म ‘एक्स’चेर दिली.
पयली दिल्ली खातीर सुरु जावपी हो प्रकल्प बेगीनूच देशभर चालीक लायतले. हाचे प्रमाण एनसीआरपी आनी 1930 खाला 10 लाखां परस चड अर्थीक लुकसाणा संबंदीत कागाळ केल्यार दिल्ली ई-क्रायम पुलीस स्टेशनांत आपोआप झीरो एफआयआर नोंद जातली. हो एफआयआर रोखडोच थळाव्या सायबर गुन्यांव पुलीस स्टेशनाक धाडटले. कागाळदारान 3 दिसां भितर सायबर गुन्यांव पुलीस स्टेशनाक भेट दिवन झिरो एफआयआर नेमान एफआयआरांत रुपांतरीत करपाक शकता.
प्रादेशिक अधिकारक्षेत्राक कुशीक करून इलेक्ट्रॉनीक पद्दतीन एफआयआर जारी करपाची ही प्रक्रिया (ई-झीरो एफआयआर) सुरवेक दिल्लींत सुरु जातली. उपरांत हेर राज्यांनी आनी केंद्रशासित प्रदेशांनी ताचो विस्तार जातलो. ह्या उपक्रमाक लागून सायबर गुन्यांव कागाळींचें एफआयआरांत सोंपेंपणान रुपांतर करपाक मेळटलें. हाका लागून पिडितांनी व्हगडायल्ले पयशे सोंपेंपणान वसूल करपाक मेळटले आनी सायबर गुन्यांवकारांचेर दंडात्मक कारवाय करपाचो मार्ग मेकळो जातलो. हालींच लागू केल्ल्या नव्या गुन्यांवकारी कायद्यांतल्या तरतुदींक लागून हें सोंपें जातलें.