भांगरभूंय | प्रतिनिधी
पणजीः सध्याच्या सायबर युगांत डिजिटल वेव्हार जितलो सोपो जाला तितलोच तो चड धोक्याचोय जाला. दक्षिण गोंयच्या चिखली हांगा एक घडणूक उजवाडाक आयल्या, हांगच्या एका ७२ वर्सां पिरायेच्या ज्येश्ठ नागरिकाचे सायबर चोरांनी १.२५ लाखां परस चड रुपया लुटले. जोसेफ मारियो लोपेस अशें ताचें नांव. एका सुपरमार्केटाचो प्रतिनिधी आशिल्ल्याचें भासोवन चोरांनी तांकां आपल्या जाळ्यांत ओडलो.
हे विशीं मेळिल्ले चड म्हायती प्रमाण, सायबर चोरान लोपेस हांचे कडेन संपर्क केलो आनी नामनेच्या सुपरमार्केटांतल्यान उलयता अशें सांगलें. सांगिल्लें काम केल्यार ताचो बँकींग वेव्हार सोपो आनी बेगीन जातलो अशें सांगून चोरान ताका एका लिंकाचेर क्लिक करपाक सांगलें. फोन करप्याच्या उतरांचेर विस्वास दवरून लोपेस हांणी आपली क्रेडीट कार्डाची म्हायती ताका दिली. ही म्हायती मेळ्ळे उपरांत सायबर चोरान कांय खिणां भितर तांच्या बँक खात्यांतल्यान १,५०,२९९ रुपया काडले. ताच्या खात्यांतल्यान पयशे काडिल्ल्याची मॅसेज येना फुडें लोपेस हांकां आपल्याक फटयिल्ल्याचें समजलें. ते रोखडेच पुलिसां कडेन पावले.
वास्को पुलिसांनी हे संबंदी भारतीय दंड संहितेच्या कलम ३१९ (२) खाला केस नोंद केल्या आनी फुडली चवकशी सुरू आसा. तशेंच वास्कोच्या मुंडाव्हेलांत आनीक एक घडणूक उजवाडाक आयल्या, हांगा महादेव तांडेल नांवाच्या मनशाक बँक अधिकारी आशिल्ल्याचें सांगून २.३० लाखांची घातली तोपी. उपअधीक्षक गुरुदास कदम हांच्या मार्गदर्शना खाला आनी पुलीस निरिक्षक वैभव नायक एन हांच्या फुडारपणा खाला पुलीस उपनिरिक्षक निखिल देसाय ह्या प्रकरणांची पुराय चवकशी करतात. डिजिटल युगांत लक्ष्य केल्ल्या ज्येश्ठ नागरिकांचो आंकडो वाडत आशिल्ल्यान अज्ञात लिंकांचेर क्लिक करचो न्हय आनी बँकेचो तपशील कोणा कडेन वांटचो न्हय असो पुलिसांनी उलो मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
