भांगरभूंय | प्रतिनिधी
नवी दिल्ली, खबरां संस्था ः सद्या वाडत आशिल्ल्या सायबर गुन्यांव लक्षांत घेवन केंद्रीय गृह मंत्रालयान व्हडलो निर्णय घेतला. भारत आतां सायबर हल्ल्या आड झुजपाची तयारी करता. हे खातीर केंद्र सरकारान ‘सायबर कमांडो’ चो पंगड स्थापन करपाचो निर्णय घेतला. तातूंत राज्यां आनी केंद्र शासीत प्रदेशांच्या पुलीस दळांचे तशेंच केंद्रीय पुलीस संघटनांच्या कर्मचाऱ्यांचो आस्पाव आसतलो. गृह मंत्रालयान पत्र बरोवन राज्यां आनी केंद्रीय प्रदेशांनी सगल्या पुलीस दळां मदल्यान धा योग्य ‘सायबर कमांडो’ वेंचून काडपाक सांगलां.
जानेवारी 2023 वर्सा जाल्ले डीजीपी/ आयजीपी परिशदेंत सायबर सुरक्षा हल्ल्यांक आडावपा खातीर, म्हायती तंत्रज्ञान नेटवर्कांची राखण करपाक, तपास करपाक प्रशिक्षीत ‘सायबर कमांडों’ चो खाशेलो पंगड तयार करचो अशी शिफारस प्रधानमंत्र्यान केल्ली. जांचे सायबर स्पेस आनी पुलीस आनी सरकारी संस्थाच्या सायबर सुरक्षेचो गरजो भागोवपाचें पुराय काम तांचें आसतलें अशें पत्रांत म्हणलां.
मजगतीं, प्रस्तावा प्रमाण सायबर कमांडो पंगड हो पुलीस संघटनेचो भाग आसतलो. तातूंत आयटी सुरक्षा आनी डिजिटल फॉरेंसिक मळार जाणकार आनी पात्रताय आशिल्ले कमांडो आसतले. राज्यां/ केंद्रशासित प्रदेश आनी केंद्रीय पुलीस संघटना /सीएपीएफांतल्यान घेतिल्ले प्रशिक्षीत पुलीस कर्मचारी आसतले.
गृह मंत्रालयाच्या पत्रांत फुडें सांगलां की, आयटी सुरक्षा आनी डिजिटल फॉरेंसिक मळार आशिल्ल्या सद्याच्या गिन्यानाचेर आनी योग्यतेचेर आदारीत सेवा कर्मचाऱ्यांच्या सगळ्या पांवड्यांतल्यान ‘सायबर कमांडो’ची निवड जातली आनी तांकां खासा तयार केल्लो निवासी प्रशिक्षण कार्यक्रम करचो पडटलो. वेंचून काडिल्ल्या कमांडोंक प्रशिक्षण मेळटलें आनी सायबर धोक्यांक आडावपा खातीर गरजेच्यो प्रणाली आसतल्यो. देशांतल्या सायबर मुळाव्या साधनसुविधां खातीरय ते जापसालदार आसतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
