भांगरभूंय | प्रतिनिधी
भलायकी मंत्रालयान केलें स्पश्ट, हे जिन्नस धोक्याचे अशी उडिल्ली वावडी
नवी दिल्ली : हालींच सोशल मिडियावेल्या कांय पोस्टांनी आनी मिडिया रिपोर्टसांनी दावो केल्लो की, भारत सरकाराच्या भलायकी मंत्रालयान सामोसा, जिलेबी आनी लाडू अश्या परंपरीक भारतीय खाणांचेर भलायकेची शिटकावणी जारी केल्ली. दाव्यां प्रमाण, लोकांक ह्या जेवणाच्या जिन्नसां विशीं शिटकावणी दिल्ली आनी हे जिन्नस सिगारेट ओडपा इतकेच धोक्याचें आसा अशें म्हणिल्लें. ही बातमी व्हायरल जातांच लोक काचाबूल जाले आनी कांय जाणांक दिसूंक लागलें, सरकार भारतीय स्ट्रीट फुडाचेर बंदी घालतलें. फाटल्या कांय दिसां सावन सोशल मिडियाचेर अशी चर्चा सुरू आशिल्ली, सामोसा, जिलेबी, लाडू अशा परंपरीक खावपाच्या जिन्नसांचेरूय तंबाखू वरीं शिटकावणी लायतले. मात, हाचेर भलायकी मंत्रालयान स्पश्ट भुमिका मांडल्या आनी ह्यो सगल्यो वावड्यो सोंपोवन उडयल्यात.
मजगतीं, हे विशीं केंद्रीय भलायकी मंत्रालयान मंगळारा निवेदन प्रसिद्ध करून म्हणलां, सामोसा- जिलेबी सारकिल्ल्या जिन्नसांचेर कसलेच तरेची शिटकावणी लावपाचो निर्णय घेवंक ना. मंत्रालयान सांगलें, वॉर्नींग लेबल लायतल्यो ह्यो खबरो निराधार आसात.
भलायकी मंत्रायलान कितें म्हणलें?
भलायकी मंत्रालयान स्पश्ट केलें, तांणी फकत कार्यालयां, कॅन्टीन, कॅफेटेरिया, लॉबी वा मिटींग रूम सारकिल्ल्या सुवातांचेर लोकांक चड साकर आनी फॅट आशिल्ल्या जिन्नसां विशीं जागरूक करपाक म्हायती तक्टो लावपाचो सल्लो दिल्लो. हाचो उद्देश लोकांक सदच्या आहारांतली साकर आनी तेलाचें प्रमाण उणें करपाची याद करून दिवप आसा, कारण देशांत मोटसाणेचें प्रमाण नेटान वाडतूच आसा.
बंदी संबंदी बातम्यो चुकीच्यो
फाटल्या कांय दिसांनी सोशल मिडियाचेर ‘सरकारान सामोसा, जिलेबी, लाडू अश्या जिन्नसांचेर ‘वॉर्नींग लेबल’ लावपाचो प्रस्ताव दवरला’अशे फटीचे पोस्ट घाल्ले. ते व्हायरल जाल्ले. मात मंत्रालयान हें स्पश्टपणान न्हयकारलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
