भांगरभूंय | प्रतिनिधी
मुंबय, खबरां संस्था: घाटकोपर वाठारांतले एके शाळेंत सोमारा सकाळीं घडिल्ल्या प्रकारान पालक आनी ह्या वाठारांतल्या नागरिकां मदीं बरोच बोवाळ निर्माण जालो. शाळेच्या कॅन्टीनांत दिल्ल्या सामोश्याक लागून १६ विद्यार्थ्यांची अचकीत भलायकी इबाडिल्ल्याची म्हायती मुखार आयली. सकाळचे सुटये वेळार खुबश्या विद्यार्थ्यांनी कॅन्टीनांतल्यान सामोशे खाल्ले. कांय भुरग्यांक पोटांत धवळप, घुंवळ आनी ओंकारीचो त्रास जावपाक लागलो. परिस्थिती गंभीर जातांच शिक्षकांनी रोखडीच वैजकी मजत घेतली. कांय विद्यार्थ्यांक पालिकेच्या दवाखान्यांत दाखल केले, जाल्यार कांय पालकांनी स्वताच्या वाहनांतल्यान भुरग्यांक खासगी हॉस्पिटलांत व्हेले. बेगोबेग उपचारांक लागून सगल्या विद्यार्थ्यांची भलायकी स्थिर आशिल्ल्यान धोको टळिल्ल्याची म्हायती दोतोरांनी दिली.
हे घडणुके उपरांत ह्या वाठारांत आनी पालकां मदीं व्हड चिंता निर्माण जाल्या. शाळा प्रशासनाचेर खुबश्या जाणांनी तिडक उक्तायली. विशेश म्हणल्यार, शाळेच्या प्राचार्यान स्वता सामोसा खातना विचीत्र वास आयिल्ल्याचें सांगलें. तांकां त्या वेळार कापरा सारको वास आयिल्ल्यान तांणी रोखडेंच कॅन्टीन कर्मचार्यांक सामोसा दिवपाक आडायिल्लें. मात, तो मेरेन कांय विद्यार्थ्यांनी ते खाल्ले. प्राचार्यांनी ह्या प्रकारा उपरांत दिल्ले म्हायतींत सांगलें, सामोसा करपाक वापरिल्ल्या तेलांत देवा मुखार दवरिल्लो कापूर चुकून पडिल्लो. तो तेलांत मिसळ्ळो. त्या तेलांत सामोसा तळिल्ले. हाका लागून भुरग्यांची भलायकी इबाडली असो अदमास उक्तायलो.
येवपी काळांत अश्यो घडणुको आडावपा खातीर शाळा प्रशासनान कॅन्टीनाची तपासणी, नितळसाणे संबंदी मार्गदर्शक तत्वाचें पालन आनी खावपाच्या जिन्नसांची गुणवत्ता नियंत्रणा खातीर अदीक खर नेम लागू करप गरजेचें आशिल्ल्याची मागणी पालक करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
