सामराचो संवसारीक विक्रमा सयत भांगराचेर नेम

भांगरभूंय | प्रतिनिधी

भारताचे सिफ्त कौर सामरान आशियायी खेळांतल्या बायलांच्या 50 मिटर रायफल थ्री पोजीशन वैयक्तीक सर्तींत आपलो शेक दवरतना संवसारीक विक्रमा सयत भांगरा पदक जिखलें. ह्याच गटांत आशी चौकसीन कांश्या पदक आपल्या नांवार केलें.

सिफ्तान पात्रताय फेरयेंत लेगीत जोड रितीन आशियायी विक्रम केल्लो. आशीन 451.9 गुणां सयत कांश्या पदक मेळयलें. चीनाचे कियोंगयुई झेंग (462.3) हिका रुप्या पदक फावो जालें. सिफ्त आनी झेंग हांचे मदलो फरक 7.3 गुणांचो आशिल्लो. हाचे वयल्यान सिफ्तान जबरदस्त आपलो शेक दवरिल्लो हें स्पश्ट जाता.

हाचे पयलीं सिफ्त, आशी आनी माणिनी कौशिक हांणी बायलांचे 50 मिटर रायफल थ्री पोजीशन सांघीक सर्तींत रुप्या पदक जिखलें. आशी, सिफ्त आनी माणिनी हे तिकडीन क्वॉलिफिकेशनांत 1764 गुणां सयत दुसरी सुवात मेळयली.

येजमान चीनान 1773 गुणां सयत भांगरा पदक जिखलें. दक्षीण कोरियान (1756) कांश्या पदक जिखलें. सिफ्त आनी आशी हांणी वळेरेन दुसरी आनी सवी सुवात मेळोवन फायनलींतली सुवात निश्चीत केल्ली. सिफ्तान 594 गूण केले. हो क्वॉलिफायींग रावण्डांत जोड रितीन नवो आशियायी विक्रम आसा.

मजगतीं, चवथ्या दिसाचें पयलें भांगर बायलांचे 25 मिटर रॅपीड फायरांत मेळ्ळें. मनु भाकर, ईशा सिंग आनी रिदम सांगवान हे तिकडीन सांघीक प्रकारांत 1759 गुणां सयत भांगरा पदक जोडलें. चीनान 1756 गुणां दुसरी आनी दक्षीण कोरियान 1742 गुणां सयत कांश्या पदक जोडलें.

नेमबाजीच्या शॉटगन स्किटांत अंगद आनंद वीर बाजवा, अनंत जीत सिंग आनी गुरजोत सिंग हांणी 355 गुणां सयत कांश्या पदक जिखलें. चीनान 362 गुणां सयत भांगर आनी कतरान 359 सयत रुप्या पदक जोडलें.

25 मिटर अॅर पिस्तोलांत ईशा सिंगान 34चो स्कोर करून रुप्या पदक जोडलें. चीनान भांगर आनी कोरियान कांश्या पदक जिखलें. नेमबाजीच्या वैयक्तीक शॉटगन स्किटांत अनंत जीत सिंगान 58चो स्कोर करून रुप्या पदक जिखलें. कुवेतान भांगरा पदक आनी कतारान कांश्या पदक जिखलें.

टॅनिसांत पदक निश्चीत

टॅनिसांत भारतान आपलें पदक निश्चीत केलें. दादल्यांच्या दोट्टी गटांत साकेत मायनेनी आनी रामनाथन रामकुमार हे जोडयेन सेमी फायनलींतली सुवात निश्चीत केली. भारताचे जोडयेन चीनाचे वू यिबिंग आनी झांग झीझेन हे जोडयेक 1-6 आनी 6-7 अशा सरळ सेटांनी हारयली. आशियायी खेळांत दोनूय सेमी फायनलिस्टाक कांश्या पदक मेळटा.

मजगतीं, बायलांच्या एकोड्या गटांत अंकिता रैना हारली. जपानाचे हारुका काजी कडल्यान तिका 3-6, 6-4 आनी 6-4 अशा तीन सेटांनी हार घेवची पडली. दादल्यांच्या एकोड्या गटांत सुमित नागल क्वॉर्टरफायनलींत हारलो. ताका चीनाच्या झांग झीजेनान 6-7, 6-1 आनी 6-2 असो हारयलो.

मिश्र गटांत भारताचे युकी भांबरी आनी अंकिता रैना हे जोडयेक तिसरे फेरयेंत हार घेवची पडली.

बॉक्सींगः निखत जरीन क्वॉर्टरींत

भारताची बॉक्सर निखत जरीन बायलांचे 50 कील वजन गटांत क्वॉर्टरफायनलींत पावली. निखत हिणें प्री-क्वॉर्टरफायनलींत दक्षीण कोरियाचे बाक चोरोंगाक 5-0 अशा फरकान हारयली.

सेलिंगेंत कांश्या पदक

विष्णु हाणें सेलिंगेंत कांश्या पदक जिखलें. अशे तरेन सेलिंगेंत भारताक अजून मेरेन दोन पदकां फावो जाल्यात.

घोडेस्वारीः हृदय-अनुष फायनलींत

ड्रेसाजाचे वैयक्तीक इंटरमिडिएट प्रकारांत भारताच्या हृदय छेडा आनी अनुष अगरवाल हाणें फायनलींत सुवात मेळयली. भारताक घोडेस्वारी प्रकारांत आनीक एक पदक जिखपाची संद आसा.

बुद्दीबळांत निर्शेणी

बुद्दीबळ सर्तीच्या वैयक्तीत गटांत भारताक एक लेगीत पदक मेळूंक ना. दादल्यांच्या वैयक्तीक गटांत भारताच्या विदीथ संतोष आनी अर्जुन कुमार हांकां वळेरेन चवथी आनी णववी सुवात फावो जाली.