भांगरभूंय | प्रतिनिधी
भांगरभूंय । प्रतिनिधी
म्हापशेंः इन्स्टाग्रामाचेर एके 14 वर्सां पिरायेचे सान चलयेक पोजडे फोटे धाडपाचो आग्रो करून तिचें लिंगीक शोशण करपाच्या प्रकरणांत कोलवाल पुलिसांनी अभिषेक सांवत (40, पीर्ण) ह्या दुबाविताक अटक केल्या.
पुलिसां कडल्यान मेळिल्ले म्हायती प्रमाण पिडेस्त चली आनी दुबावीत फाटल्या दोन वर्सां सावन इन्स्टाग्रामाचेर इश्ट आशिल्ली. फाटल्या कांय म्हयन्यां सावन ही चली मानसीक चेंपणा खाला आशिल्लें. शिकपाक हुशार आसून लेगीत ती शिक्षणांत फाटीं पडपाक लागल्ले तिच्या पालकांक दिसून आयलें. फाटल्या आयताराक तांणी चलयेक विस्वासांत घेतलें आनी चेंपणाचें कारण समजून घेवपाचो यत्न केलो तेन्ना तिणे सगली गजाल उक्ताडार हाडली.
दुबावीत हे चलयेक इन्स्टाग्रामाचेर आपले पोजडे फोटो धाडटालो आनी ताकाय तसले फोटे धाडपाची मागणी करतालो. चलयेचे आवयन कोलवाळ पुलीस स्टेशनांत कागाळ केल्या उपरांत तांणी सावंत हाचे आड आयपीसी आनी गोय बाल हक्क कायद्याच्या कमल 8 खाला गुन्यांव नोंद करून आयतारा मध्यान रातयां ताका अटक केली. सोमाराक म्हापशें न्यायालयांत ताका उबे केलें तेन्ना ताका चार दिसांची पुलीस कादय दिल्या. निरीक्षक सोमनाथ माजीक हाच्या मार्गदर्शना खाला उपनिरीक्षक सोनम वेरेकार तपास करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
