सानुल्यो खबरो

भांगरभूंय | प्रतिनिधी

० स. श्रीमती सुषमा सुभाष वेलिंगकार स्मृती प्रतिश्ठानाचो पयलो वर्धापन दीस बिरेस्तार ता. ११ एप्रिलाक सांजेच्या साडेचार वरांचेर पाटो पणजे हांगच्या कला आनी संस्कृती भवनांतल्या सभाघरांत आयोजित केला. ह्या वेळार न्यासा खाला नियमीत स्वरूपाचें पणजे ’भलायकी सेवा केंद्राचें’ उक्तावण जातलें.

० बागवाडो मोरजेच्या श्री दत्तात्रेय देवस्थानांत शिखर कलशारोहण सुवाळो ९ ते १८ एप्रील मेरेन जातलो. मंगळार ता. ९ एप्रीलाक सकाळीं १०.३० वरांचेर पादुकांचा शुध्दीकरण सुवाळो स्वाती किशोर मुळे हांच्या यजमानपदा खाला ह्या सुवाळ्याची सुरवात जातली. धा दिसांचो हो उत्सव विंगड विंगड धर्मीक आनी सांस्कृतीक कार्यावळींनी मनयतले. भाविकांनी ह्या उत्सवाक व्हडा संख्येन हाजीर रावपाचो उलो देवळाचे समितीन मारला.

० सावरकट्टा कुंकळ्ळेच्या श्री लक्ष्मी मंदीर ट्रस्टा वतीन मदर स्पर्श पॉलीक्लिनीक हे संस्थेच्या सहकार्यान भलायकी शिबिराचें आयोजन केलां. हें भलायकी शिबीर सावरकट्टा हांगच्या श्री लक्ष्मी मंदीर हॉलांत आयतार ता. ७ एप्रीलाक सकाळीं ९ ते दनपरां १ वरां मेरेन आयोजीत केलां. ह्या शिबिराक लोकांचो प्रतिसाद पळोवन श्री लक्ष्मी मंदीर ट्रस्टच्या वेवस्थापकीय समितीच्या संमतीन वैजकी शिबिराच्या काळांत वाड करतले. ह्या भलायकी शिबिरांत सर्जन, वखदां सल्लागार (काळीज आनी गोडेंमूत), बाल विशेश तज्ञ, हाडांचे विशेश तज्ञ, स्त्रीरोग तज्ञ अशे तज्ञ वैद्यकीय अधिकारी हाजीर आसतले. ह्या शिबिराक हाजीर रावन हे सेवेचो लाव घेवचो असो उलो सावरकट्टा हांगच्या श्री लक्ष्मी मंदी ट्रस्टान मारला.

० चित्पावन ब्राह्मण संघा वतीन दर वर्सा प्रमाण देवी योगेश्वरी देवस्थान, पार्वतीनगर, कुळण, सर्वण, सांखळे आयतार ता. १४ एप्रील ते आयतार ता. ५ मे मेरेन अशे २२ दीस नवे मौंजीबंधन जाल्ल्या बटूं खातीर रावपाच्या ब्रम्हचर्याश्रम वर्गाचें आयोजन केलां. द्रवीड ब्राह्मण समाजांतल्या १३ वर्सां पिराये सकयल्या बटूंक ह्या वर्गांत पयले येवपी पयले ह्या तत्वाचेर प्रवेश दितले. नांवां नोंद करपाक संघाचे अध्यक्ष दिपक मराठे (९९२३३६८७९६) वा देवस्थान वेवस्थापक संजय बर्वे (९१५६०४३८८६) हांचे कडेन संपर्क करपाचो उलो चित्पावन ब्राह्मण संघा वतीन मारला.

० हिंदू सांस्कृतिक न्यास वतीन चैत्रशुध्द प्रतिपदा गुढीपाडव्या निमतान मंगळार ता. ९ एप्रीलाक गुढी रोवपाची कार्यावळ सकाळीं ७ वरांचेर जातली. ही कार्यावळ फोंडेंच्या क्रांती मैदानार जातली. ह्या दिसा सकाळीं ६ वरांचेर गुढीपाडवो समारंभाक सुरवात जातली अशी म्हायती अध्यक्ष जयंत मिरींगकार हांणी दिली.

० मळा- कुंभारजुवेंच्या फिलोमेन डिसा मैदानार चोवथ्या १४ वर्सां पिराये सकयल्या भुरग्यां खातीर शालेय टेनिसबॉल क्रिकेट सर्तीचें आयोजन केलां. ही सर्ती ता.१० ते १२ एप्रिलाक जातली. कुंभारजुवेंच्या स्पार्कलिंग स्पोर्ट्स अँड कल्चरल क्लबान गोंय टेनिसबॉल क्रिकेट संघटणेच्या जोड पालवान हे सर्तीचें आयोजन केलां. ता. १ जानेवारी २०१० आनी ताचे उपरांत जल्मल्ले खेळगडे हे सर्तींत वांटो घेवपाक शकतातहे सर्तींत वांटो घेवप्यांनी ६ एप्रील पयलीं हरेश पार्सेकार, अजिंक्य नायक, विरेंद्र माजिक, किर्तन वैझ, निकिता नायक, संदीप नावीक, किशोर किनळेंकार हांचे कडेन संपर्क करपाचो उलो मारला.

० गोमंतक भंडारी समाज फोंडें म्हालांतले समाज भाव, भयणांक कळयता, समाजाचें आराध्य दैवत देव श्री रुद्रेश्वर देवस्थान, हरवळ्यां आयतार ता. ७ एप्रिलाक म्हयन्याळे शिवरात्री उत्सवा निमतान पालखी सुवाळ्याचें आयोजन केलां. सांजेवेळार ७ वरांचेर पालखी जातली. उपरांत आरती, प्रसाद आनी महाप्रसाद जातलो. ह्या म्हालांतल्या समाज भाव, भयणांनी व्हडा संख्येन हाजीर रावन तिर्थ प्रसादाचो लाव घेवपाचो उलो फोंडें म्हाल निमंत्रक गुरुनाथ (भाई) नायक हांणी मारला.