भांगरभूंय | प्रतिनिधी
पणजी: पुण्याच्या ‘साधना’ साप्ताहिका वतीन गोंय मुक्ती दिसाच्या आदले दिसा ‘ज्ञात आणि अज्ञात गोवा’ हो मराठी गोंय विशेशांक प्रकाशित जाता. नामनेचे रेडियो स्टोरीटेलर, गीतकार आनी पत्रकार नीलेश मिसरा हांचे हस्तुकीं तो प्रकाशीत जातलो. हो सुवाळो बिरेस्तार, १८ डिसेंबराक सांजेवेळार ५ वरांचेर मडगांवच्या गोमंत विद्या निकेतनाच्या फोमेंतो ऍम्फीथियेटरांत जातलो.
वट्ट १०० पानांच्या ह्या रंगळाळ्या अंकांत २० तज्ञांचे लेख आसात. गोंय म्हणल्यार फकत दयारदेगांच्या पर्यटनाचो प्रदेश हे गैरसमजुतीच्या फाटभूंयेर अनवळखी गोंय संबंदी विवीध विशयां वेले म्हायती दिवपी लेख या तज्ञांनी बरयल्यात.
हे कार्यावळींत मूळ गोंयचे बौद्ध तत्वज्ञान आनी पाळी भाशेचे विसाव्या शेकड्यांतले अभ्यासक धर्मानंद कोसंबी हांचे १५० वे जयंती निमतान ‘निवेन’ ह्या तांच्या १०० वर्सां आदल्या आत्मचरित्राचे नवे आवृत्तीचें प्रकाशन जातलें. ह्या पुस्तकाचें प्रकाशन गोंयांतल्या बौद्ध तत्वज्ञानाचे अभ्यासक प्रणव आजरेकर हांचे हस्तुकीं जातलें.
ह्या वेळार मिसरा आपले मनोगत उक्तायतले. आजरेकर हे ‘धर्मानंद कोसंबी हांची जीण’ ह्या विशयाचेर उलयतले.
‘साधना’च्या गोंय विशेशांकांत अॅड. उदय भेंब्रे, ज्ञानपीठकार दामोदर मावजो, लेखक, संपादक भानू काळे, जनार्दन वेर्लेकार, दत्ता दामोदर नायक, डॉ. आंद्रे राफायल फॅर्नांडीस, अॅड. क्लियोफात आल्मेदा कुतिन्हो, संपादक गिरीश कुबेर, मोहनदास लोलयेंकार, डॉ. सुबोध केरकार, ‘प्लाण्ट मॅन’ मिगेल ब्रागांझा, पत्रकार संदेश प्रभुदेसाय, लोकवेद संशोधक डॉ. जयंती नायक, अॅड आल्बेर्टिना आल्मेदा, डॉ मधू घोडकिरेकर, डॉ. संगीता सोनक, सिने दिग्दर्शक लक्ष्मीकांत शेटगांवकार, गायिका डॉ. शकुंतला भरणे, डॉ. प्राची प्रभू आनी तरुण हॉटेल धनी कार्लोस नॉयल द सौझा हांचे अभ्यासपूर्ण लेख आसात.
ह्या सुवाळ्याक ‘साधना’चे संपादक विनोद शिरसाठ, अंकाचे संयोजक दत्ता दामोदर नायक, सोयरे संपादक संदेश प्रभुदेसाय आनी संपादन सहाय्यक कुलदीप कामत हाजीर रावतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
