भांगरभूंय | प्रतिनिधी
डॉ. जगदीश काकोडकार हांची शिटकावणी
भांगरभूंय । प्रतिनिधी
पणजीः गोंयांत तोंडाच्या कांक्राची लागण जाल्ल्या वा असो कांक्र जावचे आदींच्या पांवड्यार आशिल्ल्यांचो आंकडो वाडत आसा. ताका तंबाकू खावपाचें व्यसनूच कारणीभूत आसा, अशें गोंय वैजकी म्हाविद्यालयाच्या (गोमॅकॉ) कम्युनिटी विभागाचे मुखेली तशेंच गोंय सरकारान सुरू केल्ल्या कॅन्सर स्क्रिनींग अभियानाचे नोडल अधिकारी डॉ. जगदीश काकोडकार हांणी ‘भांगरभूंय’ कडेन उलयतना स्पश्ट केलें.
फाटल्या कांय वर्सांच्यान गोंयांत कांक्राच्या दुयेंतीं मदीं व्हड प्रमाणार वाड जाता. तातूंत मरण येवप्यांचीय संख्या वाडटा. हाचेर नियंत्रण हाडचे खातीर तशेंच पयल्या पांवड्यार कांक्र कळ्ळो जाल्यार संबंदीत दुयेंतीक वाटावपा खातीर गोंय सरकारान कॅन्सर स्क्रिनींग अभियान सुरू केलां.
ह्या अभियाना खाला मोबायल कॅन्सर डिटेक्शन व्हॅनी वरवीं लोकांची फुकट तपासणी करतात. आतां मेरेन मंडूर, वाळपय, कुडचडें आनी सांखळी ह्या चार वाठारांतल्या लोकांची तपासणी केल्या. ह्या चारूय वाठारांतल्या तपासणेंत एकाक तोंडाचो कांक्र जाल्ल्याचें मुखार आयलां. तशेंच 24 जाण तोंडाचो कांक्र जावपाच्या आदल्या पांवड्यार आशिल्ल्याचें स्पश्ट जालां. गोंयांत हेर तरेचे तुळेंत तोंडाचो कांक्र जावपाचो आंकडो वाडटा. हाचें मुखेल कारण म्हणल्यार तंबाकूजन्य पदार्थांचें सेवन हेंच आसा, अशें डॉ. काकोडकार हांणी सांगलें. गुटखा, सिगरेट, पान मसालो खावप्यांची संख्या गोंयांत वाडटा. तशेंच सध्याची युवा पिळगी ई- सिगरेटीचो वापर व्हड प्रमाणांत करतात. तेच खातीर तोंडाचो कांक्र जाल्ले वा ते आदींच्या पांवड्यार आशिल्ल्यांचो आंकडो वाडटा. सरकारान सुरू केल्ल्या कॅन्सर स्क्रिनींग अभियानाक विवीध वाठारांतल्यान व्हड प्रतिसाद मेळटा. ताचो फायदो खूब जाणांक मेळटलो. कांक्राची लागण जावचे आदीं ताची म्हायती मेळ्ळी जाल्यार संबंदिताचेर तत्काळ उपचार करप शक्य जाता आनी ताचो जीव लेगीत वाटावप शक्य जातलें, अशेंय डॉ. काकोडकार हांणी स्पश्ट केलें.
गोंयांत म्हयन्याक सरासरी 139 दुयेंती
फाटल्या कांय वर्सांत गोंयांत कांक्राच्या दुयेंतींनी व्हड प्रमाणार वाड जाल्या. 2019 ते 2023 ह्या पांच वर्सांच्या काळांत म्हयन्याक सरासरी कांक्राचे 139 दुयेंती गोंयांत सांपडल्यात. 2019 ते 2023 ह्या पांच वर्सांत गोंयांत कांक्राचे वट्ट 8,296 दुयेंती मेळ्ळे. तातूंत 2019 त ,591, 2020 त 1,618, 2021 त 1,652, 2022 त 1,700 आनी 2023 त 1,735 दुयेंतींचो आस्पाव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
