सात्वीक-चिराग क्वॉर्टरफायनलींत

भांगरभूंय | प्रतिनिधी

पॅरीस ऑलिम्पिकांत भारताक पयलें पदक जिखून दिवपी मनू भाकर हिणें काल सोमारा पदकाची आनीक एक आस्त जागयली. नेमबाज मनू आनी सरबजोत हांणी 10 मिटर अॅर पिस्तल मिश्र फायनलींत तिसरी सुवात मेळयली. ही जोडी आयज चवथे सुवातेर आशिल्ले कोरियाचे जोडये आड कांश्या पदकाचे मॅचींत खेळटली.

ऑलिम्पिकाच्या तिसऱ्या दिसा भारताक 10 मिटर अॅर रायफल प्रकाराचे फायनलींत निर्शेणी आयली. भारताची नेमबाज रमिता जिंदल हिका फायनलींत हार घेवची पडली. तशेंच दादल्यांचे फायनलींत अर्जुन बबुताक लेगीत पदक चुकलें. तो 208.4 गुणां सयत चवथे सुवातेर उरलो.

नेमबाजी खेरीत बॅडमिंटन खेळगड्यांनी लेगीत आपली धांव कायम राखली. सात्विक साईराज रंकीरेड्डी आनी चिराग शेट्टी हांणी दादल्यांच्या दोट्टी गटाचे क्वॉर्टरफायनलींत सुवात मेळयली. हॉकी खेळांत भारत आनी अर्जेंटिना मदली मॅच 1-1 अशी बादाबाद उरली. जाल्यार भारताच्या दादल्यांच्या तिरंदाजी पंगडान तुर्किये पंगडाक 6-2 असो हारयलो.भारताचे सात्वीक-चिराग जोडयेन बॅडमिंटनांत दादल्यांच्या दोट्टी गटाचे क्वॉर्टरफायनलींत सुवात मेळयली. ऑलिम्पिकांत निमाण्या आठांनी सुवात मेळोवपी भारताची पयली बॅडमिंटन जोडी थारली. सी गटांत भारताची मॅच जर्मनी आड आशिल्ली. पूण, दुखापतीक लागून जर्मनीच्या पंगडान मॅचींतल्यान फाटीं सरपाचो निर्णय घेतलो आनी भारताचे जोडयेक फुडली चाल मेळ्ळी. दरेक गटांतले दोन पंगड क्वॉर्टरफायनलींत पात्र थारतले. फ्रान्सान आपल्यो दोनूय मॅची व्हगडायल्यात. अशे तरेन भारत आनी इंडोनेशिया ह्या पंगडांनी एकेक मॅच जिखून फुडले फेरयेंतली सुवात निश्चीत केली.

तिरंदाजीः भारताच्या दादल्या पंगडाक हार

दादल्यांच्या तिरंदाजी सांघीक प्रकारांत भारताचो पंगड हारलो. क्वॉर्टरफायनलींत ताका तुर्किये पंगडा कडल्यान 6-2 अशी हार घेवची पडली. भारताच्या पंगडांत तरुणदीप राय, धीरज बोम्मदेवरा आनी प्रवीण जाधव हांचो आस्पाव आशिल्लो. तुर्किये पंगडान 2 सेट 57-53 आनी 55-52 अशे जिखले. तिसरो सेट 55-54 फरकान जिखून भारतान पुनरागमन केलें. पूण, निमाण्या सेटांत तुर्किये पंगडान 58-54 फरकान जिखून सेमी फायनलींतली सुवात निश्चीत केली.

लक्ष्य सेन फुडले फेरयेंत

भारताचो युवा बॅडमिंटन खेळगडो लक्ष्य सेनान एकोड्या गटांतली आपली दुसरी मॅच जिखली. ताणें बेल्जियमाच्या ज्युलियन कारागीक 21-19 आनी 21-14 अशा गेमींनी हारयलो.

भारतान अर्जेंटिना पंगडाक आडायलो

59व्या मिनटाक हरमनप्रीतान केल्ल्या गोलाच्या नेटार भारताच्या हॉकी पंगडान अर्जेंटिना पंगडाक 1-1 असो बरोबरींत आडायलो. 58व्या मिनटा मेरेन भारत एका गोलान फाटीं आशिल्लो. हरमनप्रीतान पॅनल्टी कॉर्नराचेर बरोबरीचो गोल केलो.