भांगरभूंय | प्रतिनिधी
सात्विकसाईराज रंकीरेड्डी आनी चिराग शेट्टी हे जोडेयन हांगा चालू आशिल्ले मलेशिया ओपन बॅडमिंटन सर्तीचे सेमी फायनलींत सुवात मेळयली. बॅडमिंटन रॅंकिंगेंत दुसरे सुवातेर आशिल्ले भारताचे जोडयेन दादल्यांच्या दोट्टी गटाचे क्वॉर्टरफायनलींत चीनाचे रेन जियांग यू आनी हे जी टिंग हे जोडयेक हारोवन निमाण्या चारांतली सुवात मेळयली.
बायलांच्या दोट्टी गटांत मात भारताचे अश्विनी पोनप्पा आनी तनिषा क्रास्टो हे जोडयेक क्वॉर्टरफायनलींत हार घेवची पडली.
मजगतीं, पोरूं आशियायी खेळांत भांगरा पदक जिखपी सात्विक-चिराग जोडयेन चीनाचे जोडयेक फकत 35 मिनटांनी 21-11 आनी 21-8 अशा सरळ गेमींनी हारयली.
अश्विनी-क्रास्टो हे जोडयेक क्वॉर्टरफायनलींत जपानाचे रिन इवानागा आनी की नाकानिशी हे जोडयेन 39 मिनटांनी 15-21 आनी 13-21 अशा सरळ गेमींनी हारयली.
मलेशिया ओपन बॅडमिंटन सर्त 1937 वर्सा सावन चालू आसा. पूण, भारताच्या एकाय खेळगड्याक मलेशिया ओपन जिखपाक जमूंक ना. मलेशिया ओपन 2024 ही पॅरीस ऑलिम्पिका खातीर खेळगड्यांक क्वॉलिफायींग रॅंकिंग पॉयण्ट्स दितली. बॅडमिंटना खातीर क्वॉलिफिकेशन विण्डो पोरूं 1 मे सावन सुरू जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
