भांगरभूंय | प्रतिनिधी
सात्विकसाईराज रंकीरेड्डी आनी चिराग शेट्टी हे भारताचे बॅडमिंटन जोडयेन बीडब्ल्यूएफान काल जारी केल्ले ताज्या रॅंकिंगेंत आपले कारकिर्दींतली उत्कृश्ट रॅंकींग मेळयलें. सात्विक-चिराग जोडयेन आपलें फाटलें रॅंकिंगेंत एके सुवातेचो फायदो करीत दुसरे सुवातेर उडी घेतली.
पोरूं राष्ट्रकूल खेळांत भांगरा पदक, फ्रॅंच ओपन सुपर 750चो किताब, सध्याच्या हंगामांत इंडोनेशिया ओपन आनी स्विस ओपन 300चो किताब जिखपी सात्विक आनी चिराग हे जोडयेचे 87211 गूण जाल्यात.
सात्विक-चिराग जोडयेन आयतारा कोरिया ओपनाचो किताब जिखिल्लो. हे जोडयेन संवसारीक क्रमवारींत पयले सुवातेर आशिल्ले इंडोनेशियाचे फजर अल्फियान आनी मोहम्मद रियान हे जोडयेक 17-21, 21-13 आनी 21-14 अशा फरकांनी हारयिल्ली.
मजगतीं, भारताची पयल्या क्रमांकाची खेळगडी पी व्ही सिंधू 17वे सुवातेर कायम आसा. सिंधू सात वर्सांनी पयले खेपे पयल्या धांतल्यान भायर पडिल्ली. बायलांच्या दोट्टी गटांत त्रिशा जॉली आनी गायत्री गोपीचंद 19वे सुवातेर कायम आसा.
दादल्यांच्या एकोड्या गटांत एच एस प्रणय 10वे सुवातेर कायम आसा. लक्ष्य सेनाक दोन सुवातांचें लुकसाण जालां. तो 13वे सुवातेर घसरला. किदाम्बी श्रीकांत 20वे सुवातेर कायम आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
