भांगरभूंय | प्रतिनिधी
संवसारीक क्रमवारींत पयले सुवातेर आशिल्ली भारताची सात्विकसाईराज रंकीरेड्डी आनी चिराग शेट्टी ही जोडी सिंगापूर ओपन बॅडमिंटन सर्तीचे सुरवातीचेच फेरयेंत हारली. भारताचे जोडयेक डॅनिएल लुंडगार्ड आनी मॅड्स वेस्टरगार्ड हे इटालीचे जोडये कडल्यान 47 मिनटां मेरेन चलिल्ले मॅचींत 20-22 आनी 18-21 अशी अनपेक्षीत हार स्विकारची पडली.
सात्विक-चिराग जोडयेन ह्या म्हयन्याचे सुरवातीक थायलॅण्ड ओपन जिखिल्ली. ह्या येसाक लागून ही जोडी परतून पयले सुवातेर पाविल्ली. पूण, सिंगापूर ओपनांत हे जोडयेक अनपेक्षीत हार घेवची पडली.
एकोड्या गटांत लेगीत भारताच्या हाताक निर्शेणी लागली. आकर्षी कश्यप आनी प्रियांशू राजावत हांकां लेगीत आपल्याआपल्या गटांत पयले फेरयेंत हार घेवची पडली.
बायलांच्या एकोड्या गटांत 41वे सुवातेर आशिल्ले आकर्षीक थायलॅण्डाचे पोर्नपिचा चोइकेवोंग कडल्यान 7-21, 15-21 अशी हार घेवची पडली. दादल्यांच्या एकोड्या गटांत राजावत हॉंगकॉंगच्या ली चेउक यियू कडल्यान 21-23 आनी 19-21 असो हारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
