भांगरभूंय | प्रतिनिधी
सात्विकसाईराज रंकीरेड्डी आनी चिराग शेट्टी हे भारताचे बॅडमिंटन जोडयेन संवसारीक बॅडमिंटन क्रमवारींत दादल्यांच्या दोट्टींत परतून पयली सुवात मेळयली.
ऑक्टोबर 2023त हे जोडयेन पयली सुवात मेळयिल्ली. पूण, उपरांत तांचे क्रमवारींत घसरण जाल्ली. सात्विकाक दुखापतीक लागून कांय सर्तींतल्यान फाटीं सरचो पडिल्लो.
हालींच जाल्ले थायलॅण्ड ओपनांत हे जोडयेन वस्तादपण जोडलें आनी ताचो तांकां क्रमवारींत फायदो जालो. तांकां दोन सुवातांचो फायदो जालो. तांचें आतां 99,670 गूण जाल्यात.
दुसरे सुवातेर लियांग वेई केंग-वॅंग चॅंग ही चीनाची जोडी आसा. तांचे 99,618 गूण आसात. तिसरे सुवातेर कोरियाची कॅंग मिन ह्युक-सेओ सेउंग जी जोडी आसा. तांचे 98,015 गूण आसात.
मजगतीं, दादल्यांच्या एकोड्या गटांतले क्रमवारींत भारताचो एच एस प्रणॉय आसा. तो णववे सुवातेर आसा. बायलांच्या एकोड्या गटांत भारताची एकूय खेळगडी ना. पी व्ही सिंधू 15वे सुवातेर आसा.
बायलांच्या दोट्टी आनी मिश्र दोट्टी गटांत लेगीत भारताची एकूय जोडी पयल्या धांनी ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
