भांगरभूंय | प्रतिनिधी
सात्विकसाईराज रंकीरेड्डी आनी चिराग शेट्टी ही भारताची जोडी बॅडमिंटन रॅंकिंगेंतली पयली सुवात मेळयली. ही सुवात मेळोवपी ती भारताची पयली जोडी थारली.
फाटल्या सप्तकांत सोंपिल्ले 19वे आशियायी खेळांत हे जोडयेन दादल्यांच्या दोट्टी गटांत भांगरा पदक जिखिल्लें. हाचो फायदो तांकां रॅंकिंगेंत जालो. रॅंकिंगेंतली पयली सुवात मेळयना फुडें तांणी म्हान खेळगडो प्रकाश पादुकोण, सायना नेहवाल आनी किदाम्बी श्रीकांत हांचे वळेरेंत सुवात मेळयली. ह्या खेळगड्यांनी रॅंकिंगेंतली पयली सुवात मेळयिल्ली.
सात्विक-चिराग जोडयेन एप्रीलांत दुबय जाल्ले आशियायी चॅम्पियनशिपींत भांगरा पदक जिखिल्लें. जूनांत इंडोनेशिया ओपनांत किताब जिखून बीडब्ल्यूएफ सुपर 1000 सुपर जिखपी भारताचे पयले खेळगडे थारिल्ले.
बायलांच्या एकोड्या गटांत पी व्ही सिंधूक आशियायी खेळांत पदक जिखपाक अपेस येवन लेगीत रॅंकिंगेंत दोन सुवातांच्या फायद्या सयत 13वे सुवातेर पावली. तशेंच आशियायी खेळांत दादल्यांच्या एकोड्या गटांत कांश्या पदक जिखपी एच एस प्रणयाक एक सुवातेच्या लुकसाणे सयत आठवे सुवातेर घसरलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
