भांगरभूंय | प्रतिनिधी
सात्विकसाईराज रंकीरेड्डी आनी चिराग शेट्टी हे भारताचे जोडयेन काल इतिहास घडयलो. दादल्यांच्या दोट्टी गटांतले फायनलींत तांणी लू चिंग याओ आनी यांग पो हान हे चीनी तायपे जोडयेक 48 मिनटां मेरेन चलिल्ले फायनलींत 21-13 आनी 21-19 अशा सरळ गेमींनी हारयली. एकठांय खेळटना भारताचे हे जोडयेन अंदूंच्या हंगामांतलो दुसरो किताब जिखलो. तशेंच 39 वर्सांचो दुकळ सोंपयलो.
हाचे पयलीं म्हणल्यार 1983त पार्थो गांगुली आनी विक्रम सिंग हे भारताचे जोडयेन वस्तादपण जोडिल्लें. रंकीरेड्डी आनी चिराग हांचे फायनली विशीं सांगचें जाल्यार दोगांयनी उत्कृश्ट रितीन मॅचीक सुरवात केली. दोगांयनी रोखडीच 5-0 अशी आघाडी केली. एका वेळार तांणी 11-6 अशी व्हड आघाडी घेतिल्ली. उपरांत रंकीरेड्डी आनी चिराग हे जोडयेन 21-13 फरकान पयली गेम जिखली.
दुसरे गेमींत लेगीत भारताचे जोडयेन बरी सुरवात केल्ली. पूण, चीनी तायपेचे जोडयेन 11-5 अशा फरकान मुखार आशिल्ले भारताचे जोडयेचेर चेपण हाडपाचो यत्न केलो. हातूंत चीनी तायपे जोडी येसस्वी लेगीत थारली. तांणी 14-14 अशी बरोबरी सादली. मुखार दोनूय जोडयांनी एकेक गुणा खातीर संघर्श केलो. एका वेळार स्कोर 19-19 असो जाल्लो. हे स्थितींत लेगीत भारताचे जोडयेन संयम वगडावंक ना. तांणी उत्कृश्ट खेळ करीत 21-19 अशा फरकांनी दुसरी गेम जिखून वस्तादपण जोडलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
