भांगरभूंय | प्रतिनिधी
गोंयांत एप्रिल 2025 मेरेन 60 हजार खटले आडकल्यात
नवी दिल्ली, खबरां संस्था ः भारत भरांतल्या कनिश्ठ आनी सर्वोच्च न्यायालयांत वट्ट साडे पांच कोटी खटले प्रलंबीत आसात. ‘तारीख पे तारीख’ हे खातीर हे खटले आडकल्यात. गोंय विधानसभेंत सादर केल्ल्या आंकडेवारी प्रमाण, एप्रिल 2025 मेरेन गोंयांत जिल्हो आनी कनिश्ठ न्यायालयांत 60 हजार खटले प्रलंबीत आसात.
केंद्रीय कायदो मंत्री अर्जुन राम मेघवाल हांणी संसद सभागृहात प्रलंबीत आशिल्ल्या खटल्यां विशीं म्हायती दिली. हे संबंदी विचारिल्ल्या प्रस्नाक लेखी जाप दितना तांणी ही म्हायती दिली.
केंद्र सरकारान दिल्ल्या आंकडेवारी प्रमाण 90, 897 खटले सर्वोच्च न्यायालयांत प्रलंबीत आसात. भारतांतल्या उच्च न्यायालयांत 63,63,406 खटले प्रलंबीत आसात. 4 कोटी 84 लाख 57 हजार 343 खटले कनिश्ठ न्यायालयांत प्रलंबीत आसात. हातूंत 8 डिसेंबर 2025 मेरेनचो डेटा आस्पावीत आसा.
मंत्री मेघवाल हांणी सभाघरांत सांगलें, खटले प्रलंबीत उरपा फाटल्यान वेगवेगळीं कारणां आसात. तातूंत पुराव्याचें स्वरूप, वकील, साक्षीदार, तपास यंत्रणा आनी वादींचे सहकार्य, प्रकरणांची गुंतागुंत, न्यायालयांत फावो ती मुळावी सुविधा नासप आनी कर्मचाऱ्यांचो उणाव हांचो आस्पाव आसा.
गोंयांत एप्रिल 2025 मेरेन 60 हजार खटले प्रलंबीत
मजगतीं, एप्रिल 2025 च्या आंकडेवारी प्रमाण, गोंयच्या जिल्हो आनी कनिश्ठ न्यायालयांत 60 हजार खटले प्रलंबीत आसात. हो डेटा विधानसभा अधिवेशनांत सादर केल्लो. तेन्नाचो कायदो मंत्री आलेक्स सिक्वेरा हांणी आमदार आलेक्स रेजिनाल्ड लॉरेन्स हांणी विचारिल्ल्या प्रस्नाक जाप दितना ही म्हायती दिल्ली. ह्या आंकडेवारींत उत्तर गोंयच्या जिल्हो आनी कनिश्ठ न्यायालयांतल्या 42,680 आनी दक्षीण गोंयांतल्या 17,097 प्रकरणांचो आस्पाव आसा. दोनूय मेळून गोंयांत सुमार 60 हजार खटले प्रलंबीत आसात अशें आंकडेवारींतल्यान दिसून येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
