भांगरभूंय | प्रतिनिधी
मुख्यमंत्र्यां हस्तुकीं काम सुरू : म्हयन्याक सवाय लाख रु. वाटावतले
दिवचल: हरवळें- सांखळेच्या रवींद्र भवनाचेर गोवा एनर्जी डेव्हलपमेंट एजन्सी वतीन बसोवपी सौरऊर्जा युनीट बसोवपाच्या कामाची सुरवात मुख्यमंत्री डॉ. प्रमोद सावंत हांचे हस्तुकीं जाली.
गोंयांत सौरऊर्जा प्रकल्प बसोवपी सांखळे रवींद्र भवन गोंयचें पयलें रवींद्र भवन थारतलें. हाका लागून म्हयन्याक सवाय लाख रुपया वाटवतले. एका म्हयन्यांत काम पुराय करून गोंय घटक राज्य दिसा म्हणल्यार ३० मेंक उक्तावण करपाचो संकल्प आशिल्ल्याचें रवींद्र भवनाचे उपाध्यक्ष दत्ताराम चिमुलकार हांणी सांगलें.
रवींद्र भवनाक सध्या दर म्हयन्याक अडेज लाख रुपयाचें लायटीचें बील येता. मात हे सौर ऊर्जेच्या प्रकल्पा उपरांत सुमार सवाय लाख बील वाचतलें. निश्चीतपणान पन्नास टक्के फायदो जातलो अशें तांणी सांगलें. तशेंच सकाळच्या सत्रातं निर्माण जावपी ऊर्जा आमी ग्रीडाक दितले. ग्रीडा वरवीं आमकां म्हयन्याक वा वर्सान ताचें मोल मेळपाक मजत जातली अशें तांणी सांगलें.
मुख्यमंत्री डॉ. प्रमोद सावंत हांणी सांगलें, देश पांवड्यार प्रधानमंत्री नरेंद्र मोदी हांणी सौर ऊर्जा वापरा खातीर जायत्यो येवजण्यो राबयल्यात. गोंय राज्यान विवीध पांवड्यावेल्यान ताची अंमलबजावणी करची होच आमचो हेत. जायते कडेन असले प्रयोग केल्यात.
राज्यांत जीं रवींद्र भवनां आसात, तातूंत सांखळे रवींद्र भवानान हो पयलो प्रकल्प सुरू करून पुरायेन सौरऊर्जेचेर चलपी पयलें रवींद्र भवन म्हणून नांव मेळयिल्ले खातीर तांणी परबीं भेटयलीं.
वीज वाटावपाचे फाटभूंयेर सौरऊर्जेचे प्रकल्प सामके उण्या दरांत तशेंच उत्पन्न मेळोवपी आशिल्ल्यान सवलतीच्या दरांत मेळटात. लोकांनी वेगवेगळे उद्देगांचेर, तशेंच घराघरांनी ते बसोवन घेवचे, अशें मुख्यमंत्र्यानी सांगलें.
सुमार ६० लाख रुपया खर्च करून हो सौर ऊर्जा प्रकल्प उबारतात. ह्या वेळार रवींद्र भवनाचे पदाधिकारी तशेंच भाजपाचे कार्यकर्ते हजर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
