भांगरभूंय | प्रतिनिधी
भांगरभूंय । प्रतिनिधी
दिवचलः साखळी पालिका मंडळान भाजपान सत्ता मेळयले उपरांत जायते नवे प्रकल्प चालीक लावपाची तयारी चल्ल्या. फुडल्या सप्तकांत मुख्यमंत्री डॉ प्रमोद सावंत हाचे उपस्थितींत पालिका मंडळाची पयली बसका जातली. तातूंत नव्या येवजण्यांक चालना मेळटली.
पालिका वेंचणुकेंत भाजपा समर्थक पॅनलाचे 11 नगरसेवक वेंचून आयल्यात. साखळेच्या उदरगतीचो मास्टर प्लॅना प्रमाण आमी कांय प्रकल्प निश्चीत केल्यात. लोकांक दर्जेदार सुविधा उपलब्द करून दिवपाचें काम पालिका मंडळ करतले अशें डॉ सावंत हांणी सांगलां. साखळी वाठारांत पूल, रस्ते, भलायकी, कला, खेळ आनी शैक्षणीक प्रकल्प येवजण्योो मार्गाक लागल्यात. तरीय कांय नवे प्रकल्प हातांत घेतले अशेंय तांणी सांगलां.
नगराध्यक्ष रश्मी देसाय हिणे मुख्यमंत्री आनी पालिका मंडळाक विस्वासांत घेवंन वेगवेगळ्यो येवजण्यो निश्चीत करतले अशें सांगलां.
उपनगराध्यक्ष आनंद काणेकार हांणीय कांय येवजण्यो निश्चीत केल्यात. पालिका वाठारांत सगळ्या सुविधा तयार करपाचें आमचें लक्ष्य आसा अशें ताणे सांगलें. साखळे बाजारांत भव्य अशें बाजार संकुल उबारपाक आमी प्राधान्य दितले अशें नगरसेवक दयानंद बोर्येकर हाणे सांगलें. पालिका मंडळाचे पयले बसकेंत ताचेर चर्चा जातली. जे प्रकल्प पुराय जाल्ले नात ते पुराय करपाचे खासा लक्ष दितले अशे यशवंत माडकारान सांगलें.
साखळी शारांत मलनिस्सारण प्रकल्प पुराय जावपाचो आसा. साखळेकारांक किदें जाय हाचो विचार करून मास्टर प्लॅनाचें काम फुडें व्हरतले. साखळे शारांत उदरगतीची नवीं दारां उक्ती जातलीं अशें काणेकारान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
