भांगरभूंय | प्रतिनिधी
भांगरभूंय । प्रतिनिधी
पणजीः साखळी पालिका वेंचणुके खातीर प्रभाग फेर रचणूक करून प्रभाग आरक्षीत केल्यात ताका आव्हान दिल्ले याचिकेंत दुरुस्ती करपा खातीर याचिकादार नगराध्यक्ष राजेश सावळ आनी प्रवीण ब्लेगन हांकां मुंबय उच्च न्यायालयाच्या गोंय खंडपिठान वेळ दिला आनी फुडली सुनावणी 11 एप्रिलाक दवोरल्या.
साखळे पालिकेचे 13 प्रभाग आशिल्ले ते डिचोलीचो मामलेदार आनी वेंचणूक नोंदणी अधिकाऱ्यान आतां 12 केल्यात. ताका सावळ आनी ब्लेगन हांणी न्यायालयांत आव्हान दिलां. फाटल्या 28 फेब्रुवारीक राज्य वेंचणूक आयोगान नोटीस जारी करून साखळी पालिकेचो प्रभाग फेर रचणुकेचो मसुदो लोकांक पळोवपाक दवोरल्लो. ते उपरांत मे म्हयन्यांत वेंचणूक घेवपाची प्रक्रिया आयोगान सुरू केल्या.
आव्हान याचिकेचेर सुनावणी सुरू आसतना वेंचणूक आयोगान साखळी पालिकेचे 2, 6, 11 आनी 12 हे प्रभाग बायलां खातीर राखीव केल्यात शिवाय 10 आनी 11 हे ओबीसी खातीर राखीव दवोरल्यात. ही म्हायती याचिकादारांनी खंडपिठाक दिवंन याचिकेंत दुरुस्ती करून ती सादर करपा खातीर वेळ मागलो. खंडपिठान ती मानून घेवन फुडली सुनावणी 11 एप्रिलाक दवोरल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
