भांगरभूंय | प्रतिनिधी
भांगरभूंय । प्रतिनिधी
दिवचलः साखळेच्या ईगल्स स्पोर्ट्स क्लबाचो भांगरा महोत्सव 3 फेब्रुवारीक वेगवेगळ्या कार्यावळींनी मनयतले. ईगल डे अशें अशें ताका नांव दिला. भांगरा महोत्सवी वर्सा निमतान वर्सभरयां खेळ आनी सांस्कृतीक कार्यावळीचें आयोजन करतले अशी म्हायती क्लबाचो अध्यक्ष प्रशांत फातर्पेकार हाणे एके पत्रकार परिशदेंत दिली. ह्या वेळार भांगरा महोत्सव आयोजन समितीचो अध्यक्ष प्रवीण ब्लेगनस, सचीव अमोल बेतकीकार, भांडारी तुषार देसाय हाजीर आशिल्ले.
3 फेब्रुवारीक सांजे 7 वरांचेर साखळेच्या तारा ओपन ऍर संकुलांत जावपी ईगल डे कार्यावळीक मुखेल सोयरो म्हणून मुख्यमंत्री डॉ प्रमोद सावंत, खेळां मंत्री गोविंद गावडे, गोंय क्रिकेट असोसिएशनाचो विपुल फडके, फुटबॉल संघटनेचो कायतान फर्नांडीस, साखळेची नगराध्यक्ष रश्मी देसाय हाजीर रावतली. ह्या वेळार खेळा मळार योगदान दिवपी मानेस्तांचो मुख्यमंत्र्यांचे हस्तुकीं भोवमान करतले.
पन्नास वर्सांचे वाटचालींत क्लबान क्रिकेट, फुटबॉल, कबड्डी आनी हेर खेळां प्रकारांत राष्ट्रीय आनी आंतरराष्ट्रीय खेळगडे तयार केले. राज्य पांवड्यार क्लबान जायत्यो सर्ती जिखल्यात, सामाजीक जाणीव दवोरून जायत्या जाणांक मजतीचो हात दिलो. भांगरा महोत्सवी कार्यावळींत क्लबाचे आदले आनी सध्याचे पदाधिकारी, पुरस्कृर्त्यांनी हाजीर रावंन कार्यावळ येसस्वी करची अशें क्लबाच्या कार्यकारी समितीन मागलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
