भांगरभूंय | प्रतिनिधी
37वे राष्ट्रीय खेळां सर्तींत येजमान गोंयान बॉक्सिंगेंत आनीक चार पदकां निश्चीत केलीं. अशे तरेन गोंयान अजून मेरेन बॉक्सिंगेंत वट्ट 9 पदकां निश्चीत केल्यात. बॉक्सींग सर्त म्हापशेंच्या पेडें इन्डोर स्टेडियमार चालू आसा. दोन खेपेची युवा संवसारीक चॅम्पियन साक्षी चौधरीन गोंयच्या पंगडाचें प्रतिनिधित्व करतना उत्कृश्ट प्रदर्शन केलें.
गोंयच्या झमीर रोशनाक दादल्यांच्या लायटवेट 51 कील वजन गटांचे उपांत्यपुर्व फेरयेंत सिक्कीमच्या आर ए कृष्णा कलिशा आड फुडली चाल मेळ्ळ्या उपरांत, गोंयच्या उरिल्ल्या तीन बॉक्सरांनी आपल्याआपल्या वजन विभागाचे उपांत्य फेरये मेरेन मजल मारली.
गोंयचें प्रतिनिधित्व करतना साक्षीन बायलांच्या 50 कील वजन लायट फ्लायवेट गटाचे उपांत्य फेरयेंत सुवात मेळयतना हिमाचल प्रदेशाचे ईशा ठाकूरा आड सोंपें जैत जोडलें.
साक्षीन सुरवाती सावन जबरदस्त प्रदर्शन केलें. दादल्यांच्या गटांत गोंयच्या गोरखा आकाशान 63.5 कील लायट वेल्टर वजन गटांत आंध्र प्रदेशाच्या डोनी संदीपाक 5-0 असो हारयलो, जाल्यार रजतान 71 कील लायट मिडलवेट गटांत महाराष्ट्राच्या राहिलाक हारोवन निमाण्या चारांनी सुवात मेळयली.
ते पयलीं आयतारा निहारिका (60 कील वजन), सनमचा चानू (75 कील), लोकेश (80 कील वजन), साई आयुष (92 कील वजन) आनी गौरव चौहान (92+ कील) हाणें आपल्याआपल्या वजन गटांत जैत जोडून गोंया खातीर पदकां निश्चीत केलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
