भांगरभूंय | प्रतिनिधी
गोंय साक्षीदार सुरक्षा येवजण 2025 अधिसुचीत
भांगरभूंय । प्रतिनिधी
पणजी : फौजदारी खटल्यांतल्या साक्षीदाराच्या जिवाक धोको आसलो वा ताका सुरक्षेची गरज लागली जाल्यार ती दिवपा खातीरची तजवीज आशिल्ली गोंय साक्षीदार सुरक्षा येवजण 2025 अधिसुचीत जाल्या. फौजदारी खटल्यांतल्या साक्षीदारान अर्ज केल्या उपरांत समिती वरवीं ताका मान्यताय दिवची पडटली. हाचे उपरांत साक्षीदाराक साक्ष दिवपा खातीर एस्कार्ट सुविधा सयत हेर सुरक्षा मेळटली. येवजणे खातीर खासा साक्षीदार सुरक्षा निधी स्थापन करचो पडटलो.
हे येवजणे खाला सरकाराक राज्य साक्षीदार संरक्षण प्राधिकरण स्थापन करप गरजेचें आसा. गृह फांट्याचो वरिश्ठ सचीव प्राधिकरणाचो अध्यक्ष आसतलो. पुलीस म्हासंचालक, पुलीस म्हानिरिक्षक आनी अभियोक्ता संचालक हे प्राधिकरणाचे हेर वांगडी आसतले. प्राधिकरणाची 6 म्हयन्यांत एक बसका जावपाक जाय. येवजणेची कार्यवाही करपाची जापसालदारी प्राधिकरणाची आसतली.
तशेंच अर्जांचो विचार करपा खातीर दरेका जिल्ह्यांत एक समिती आसतली. जिल्हो आनी सत्र न्यायाधीश हे समितीचे मुखेली आसतले. अभियोक्ता खात्याचे मुखेली आनी अतिरिक्त जिल्हो दंडाधिकारी समितीचे वांगडी आसतले. ही समिती साक्षीदारां कडल्यान आयिल्ल्या अर्जांचो विचार करून निर्णय घेतली.
सरकाराक साक्षीदार सुरक्षा निधी तयार करचो पडटलो. अर्थसंकल्पांत सरकाराक तजवीज करची पडटली. सीएसआर येवजणे खाला लेगीत निधी घेवपाची मेकळीक आसा. सेवाभावी संस्थांच्यो देणग्यो वा न्यायालयांत जमा जाल्ली दंडाची रक्कमेचो ह्या निधींत आस्पाव करपाची मेकळीक आसा.
साक्षीदारांक आसपी धोक्याच्या तीन गटांत वर्गीकरण केलां. अ गटांत साक्षीदार वा ताच्या कुटुंबांतल्या मनशाक जिवाचो धोको आसता. ब गटांत साक्षीदाराची वा ताच्या कुटुंबाची मालमत्ता वा प्रतिश्ठा धोक्यांत येवप शक्य आसता.
क गटांत धोको मर्यादीत प्रमाणांत म्हणल्यार साक्षीदार वा कुटुंबाची सतवणूक जावपाची शक्यताय आसता. येवजणे खातीर साक्षीदारांनी जिल्ह्याचे समिती कडेन अर्ज सादर करचो पडटलो. गरजेचीं कागदपत्रां जोडचीं पडटलीं. समिती पुलीस अधिक्षका कडेन संभाव्य धोक्या विशीं अहवाल (थ्रीट अॅनेलीसीसी रिपोर्ट) मागतली. ह्या अहवालाचेर आदारीत साक्षीदाराच्या अर्जाक मान्यताय दिवपाचो निर्णय जातलो. अर्ज तशेंच अर्जा वयले सुनावणीची प्रक्रिया विश्वसनीय दवरची पडटली. अर्जाक मान्यताय मेळ्ळे उपरांत कार्यवाही करपाची जापसालदारी जिल्हो समितीची आसतली. कार्यवाही खातीर साक्षीदार सुरक्षा फाटो तयार करचो पडटलो.
साक्षीदारा खातीर आशिल्ल्यो सुरक्षेच्यो सुविधा
– तपास वा सुनावणीवेळार साक्षीदार आनी आरोपी एकामेकासमोर येवचे ना, अशी वेवस्था
– इमेल आनी फोन कॉलाचेर देखरेख
– साक्षीदाराक वेगळोच फोन नंबर दिवपाची वेवस्था
– सीसीटीव्ही, अलार्म, सुरक्षा दारां, फेंसींग अशेंउपाय करप
– साक्षीदाराक वेगळे नाव दिवन ताची वळख गुप्त दवरप
– साक्षीदाराक आप्तकालीन स्थिती खातीर मनशाची वेवस्था
– साक्षीदाराच्या घराकुशीक नेमीत गस्त दवरप
– साक्षीदाराची तशेच कुटुंबाची रावपाची वेवस्था तात्पुरती वेगळी करप
– न्यायालयात वताना एस्कोर्टाची तशेच सरकारी गाडीची वेवस्था
– सुनावणी इन कॅमेरा घेवप
– वन वे मिरर, स्क्रीन वा साक्षीदाराचे तोंड आरोपीक दिसचे ना, अशे तरेन कोर्ट रूमाची वेवस्था – साक्षीदाराक गरज पडटा तेन्ना निधीतल्यान अर्थीक मजत दिवप
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
