भांगरभूंय | प्रतिनिधी
हालींच संवसारभर साक्षरताय दीस मनयलो. मानवी समाज सुसंस्कृत करून समाजाचें शिक्षणाच्या बळार कल्याण जावन सगल्यांक विकासाच्यो समान संदी उपलब्ध जावच्यो. ज्ञानी लोकां पसून अज्ञानी लोकांची जावपी पिळवणूक, फटवणूक, शोशण आदीं पसून मुक्तताय जावची. निरिक्षर लोकांक साक्षरतायेची संद मेळची हे खातीर राष्ट्रकुलाच्या ‘युनेस्को’ हे संघटणेन 1965 वर्सा संवसारीक पांवड्यार साक्षरताय दीस मनोवपाची घोशणा केली आनी ताच्या फुडल्या वर्सां सावन आठ सप्टेंबराक संवसारभर ती प्रथा सुरू जाली. आयज इतल्या वर्सां उपरांतूय युनेस्कोन सुरू केल्ल्या संवसारीक साक्षरताय दिसान संवसारभर सुमारा भायर प्रतिसाद मेळटा. युनोस्कोचे व्याख्ये प्रमाण साक्षरताय म्हणल्यार मनशाक दीसपट्टें जिणेशैली कडेन निगडीत गजाली विशीं बरोवंक, वाचूंक येवप. मनशाच्या जिणेंतल्या घडामोडींचें विश्लेशण करूंक येवप आनी वैयक्तीक स्वातंत्र्य अबाधीत दवरून स्वताच्या आनी समाजाचे उदरगतीक हातभार लावप.
शिक्षणाचे म्हत्व कोणाक ना? मनीस कल्याणा खातीर शिक्षण सामके म्हत्वाचें आसा. पूण फक्त शिक्षण दिवप म्हणल्यार सारक्षताय न्हय जाल्यार मनशाच्या उदरगतीच्या वांट्यांत आडखळ जावपाचो, गरिबीक नश्ट करपाचो तो एक वैशिश्ट्यपूर्ण आनी बळिश्ट मार्ग आसा. जिणेंतल्या आव्हानांक तोंड दिवपा खातीर आनी समाजाक सुदारणा करपा खातीर सारक्षताय एक परिणामकारक साधन आसा, म्हणूनच युनोस्कोन संवसारभर साक्षरताय अभियान राबयलें. युनेस्कोन सुरू केल्ल्या ह्या सारक्षरताय अभियानाक संवसारभर बरो प्रतिसाद मेळ्ळो. भारतांत लेगीत ह्या अभियानाचे बरें फलीत दिसून आयलें आनी एका आंकडेवारी प्रमाण नदर घालीत जाल्यार अशें दिसून येता की 1950 वर्सा देशांत शिक्षणाचें प्रमाण 18 टक्के आशिल्लें.
1991 वर्सा साक्षरतायेचें हें प्रमाण 52 टक्क्यांचेर जाल्यार 2011 वर्सा 75.06 टक्क्यांचेर पावलें. पूण शंबर टक्के साक्षर जावपाक अजून खूब वेळ आसा. केरळा सारकें राज्य सोडून हेर राज्यां मदली स्थिती व्हडलीशी उमेद वाडोवपी ना. बिहार, उत्तर प्रदेश, ओडिशा ह्या राज्यांनी 6 ते 14 वर्सां पिराये गटांतल्या विद्यार्थ्यांक पुरायपणान फुकट शिक्षण दितात. तरी लेगीत थंय सारक्षरतायेचें प्रमाण उणेंच आसा. हे खातीर राजकी फुडारी आनी प्रशासकी अधिकाऱ्यांनी उदासीनताय, शासन आनी लोकां मदल्या सामंजस्याचो उणाव, सरकारी शाळांची दुरावस्था, बऱ्या आनी कर्तृत्वान शिक्षकांचो उणाव, निधीची अनुपलब्धताय आदीं गजालीं हाका कारण आसूंक शकतात. त्या कारणांचो गंभीरतायेन विचार करून शिक्षणाचें बरें वातावरण निर्माण करप ही सरकाराची जापसालदारकी आसा. शिक्षण हें मनीस कुळयेच्या उदरगतीचें शास्त्र आसा. देशांतली दरेकी व्यक्ती साक्षर जावंक जाय तरूच देश उदरगत करूंक पावतलो.
साक्षरतायेचें प्रमाण वाडोवपा खातीर गांवगिऱ्या आनी आदिवासी वाठारांनी प्रौढ शिक्षणाची भाशा थळाव्या पांवड्यार आसची. ताका लागून थळाव्यां मदीं ते विशीं आपुलकी निर्माण जातली. ल्हान भुरग्यांक शिक्षण दितना तें शिक्षण कशें मजेशीर जातलें हाचे कडेन लक्ष दिवंक जाय. आदिवासी वाठारांनी आनी ल्हान ल्हान गांवांनी बऱ्या प्रशिक्षण केंद्राची गरज आसा. ह्या वाठारांनी शिक्षणीक कार्याशाळा घेवंक जाय. गांवांनी ग्रामीण विकासा कडेन संबंदीत शिक्षणीक कार्यावळी प्रधान्यान घेवंक जाय. शिक्षणाच्या मळार बदलांची दखल घेवन सरकारी शाळांनी शिक्षकांच्या प्रशिक्षणा कडेन लक्ष दिवंक जाय. थळाव्या पांवड्यार शिक्षणीक कंद्रांचेर वाचन, लेखन, साहित्य थळावे भाशेंत मेळूंक जाय. खाजगी शिक्षण संस्थांचेर सरकारी नियंत्रण आसूंक जाय.
तशें पळोवंक गेल्यार भारतांत शिक्षणीक संस्था आनी विद्यापिठांचो उणाव ना. दर वर्सा हजारांनी विद्यार्थी पदवी घेतात. पूण इतल्यो पदव्यो घेवन लेगीत ह्या पदवीधरांचो समाज आनी देशाक तर फायदो जायच ना. त्या पदव्यांच्या बळार तांकां नोकऱ्यो लेगीत मेळनात. ताका लागून लोकांक फक्त शिक्षण दिवन चलचें ना. जाल्यार लोकांक योग्य आनी कुशळटायपूर्ण शिक्षण दिवप गरजेचें आसा.
तरिपूण देशांतलें साक्षरतायेचें प्रमाण वाडोवपा खातीर सरकारी पांवड्यार विवीध उपक्रम राबयतात. सर्व शिक्षा अभियान, समग्र शिक्षा अभियान, मध्यान भोजन येवजण, प्रौढ शिक्षण येवजण, राजीव गांधी साक्षरताय अभियान, नवभारत साक्षरताय अभियान हे सारके उपक्रम राबोवन सरकार देशांतल्या साक्षरतायेचो टक्को वाडोवपाचो यत्न करता. ह्या सगल्या उपक्रमांक बरो प्रतिसादूय मेळत आशिल्ल्यान रोखडेच आमी 100 टक्के सारक्षतायेचें उद्दिश्ट साध्य करूं.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
