साकाड्डें खैरी आनी सायलाच्या लाकडाच्या तस्करीचें जालां केंद्र

भांगरभूंय | प्रतिनिधी

भांगरभूंय । प्रतिनिधी
फोंडेंः धारबांदोडें तालुक्यांतलें साकोड्डें पंचायत वाठार सद्या खेरी आनी सायलाच्या लाकडाच्या तस्करीचें केंद्र जाल्ल्याचें दिसून येता. फाटल्या कांय दिसां सांवन खैरीचें प्रकरण गाजत आसतना ह्या वाठारांतल्यान सायलाचें लाकूड आलिशान वाहनांत घालून व्हरतात अशें थळावे लोक सांगपाक लागल्यात. हाका राना खात्यांतल्या कांय कर्मचारी सहकार्य करतात असो दुबाव आसा.
वाळपय रानां विभागान गुळेली आनी केरी हांगा कारवाय करून हालींच लाकडाची येरादारी करपाक हाडल्लें वाहन आनी खैरी लाकूड जप्त करून 12 जाणां आड गुन्यांव नोंद केल्यात. ताचें कनेक्शन साकोड्ड्या आशिल्ल्याचें उक्तें जातगीर कुळे राना विभागान कारवाय करून खैरीचें लाकूड जप्त केलां. केल्ले चवकशे वेळार सायलाचें लाकूड आलिशान वाहनांतल्यान व्हरून पावोवपी एक टोळी आसा अशें सामकार आयलां. हीच टोळी खैरीच्या लाकडाची येरादारी करता. ह्या टोळीच्या सूत्रधाराची  एका राजकी फुडाऱ्या कडेन लागींचे संबंद  आशिल्ल्यान आतां कोण हात लावपाक शकना. ताका लागून लाकूड चोरी प्रकरणांत कारवाय जावपाची शक्यताय ना अशें थळावे लोक सांगतात.
साकोड्डेंच्यान सत्तरीत वचपी रस्त्या वयल्यान लाकडाची बेकायदेशीर येरादारी चलता. साकोड्ड्या राना खात्याच्या कार्यालया पसून कांय अंतराचेर आशिल्ल्या एका खाजगी रानांत कांय दिसां पयलीं खैरीच्या झाडांची कत्तल करून लाकडाची येरादारी केल्ल्याचें उक्ताडार आयलां. लाकडाची तस्करी करपी सूत्रधारान राना खात्याचे सुवातेंत एक व्हडलें घर बांदलां आनी थंय राजकी फुडारी आनी सरकारी अधिकाऱ्याचें यो-वच जाता अशें थळावे लोक सांगतात.