भांगरभूंय | प्रतिनिधी
साकरेचें मोल मळबाक तेंकलें
नवी दिल्ली, खबरां संस्था ः दाळ, तांदूळ, गंव, टोमॅटो, पाचवी भाजी हांचे उपरांत साकर परत एक फावट म्हारग जाल्या. फाटल्या 15 दिसांत साकरेचे दर 3 टक्क्यांनी वाडल्यात. मंगळारा साकरेचे दर 37,760 रुपया (454.80 डॉलर) जाले जे ऑक्टोबर 2017 उपरांतले सगळ्यांत चड दर आसा. साकरेचो दर 3 टक्क्यांनी वाडून फाटल्या 6 वर्सांत सगळ्यांत चड दराक पावला.
देशांतल्या मुखेल साकर उत्पादक राज्य महाराष्ट्र आनी कर्नाटकांत अंदूं सरासरी परस उणो पावस पडला, जाका लागून ऊस उत्पादनाचेर परिणाम जावं येता अशें वेपारी आनी उत्पादकांनी सांगलां. 2023- 24 वर्साच्या पिकाच्या हंगामांत ऊसाचें उत्पादन उणें जाल्यार साकर चड म्हारग जावंक शकता.
साकर उत्पादनाचो नवो हंगाम 1 ऑक्टोबर सावन सुरू जातलो. अशे परिस्थितींत पावस उणो पडपाक लागून साकर उत्पादन 3.3 टक्क्यांनी देंवपाची शक्यताय आसा. देखून साकरेचें उत्पादन 31.7 दशलक्ष मेट्रीक टन मेरेन पावूंक शकता. अशे परिस्थितींत सामान्य मनशाक परत एक फावट चलनवाडीचो भार सोंसचो पडटलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
