भांगरभूंय | प्रतिनिधी
भांगरभूंय । खबरां मेज
पणजीः करमळी हांगच्या साई पूर्वा आर्टंस संस्थेन प्रभादेवी- मुंबयच्या रवींद्र नाट्य मंदिरांत सादर केल्ल्या वि. वा. शिरवाडकर हांच्या ‘नटसम्राट’ नाटकाच्या प्रयोगाक मुंबयकारांनी बरी दाद दिली. ज्येश्ठ सिने अभिनेतो सुनील गोडबोल, महाराष्ट्राची हास्यजत्रा फेम प्रभाकर मोरे, पु ल देशपांडे महाराष्ट्र कला अकादमीचो संतोष रोकडे आनी हेर मानेस्तांनी व्हो प्रयोग पळोवन कलाकारांची तुस्त केली अशी म्हायती नाटकाचो दिग्ददर्शक आनी मुखेल कलाकार भालचंद्र उसगांवकार हाणे दिली.
गोंय सरकाराचें कला आनी संस्कृती खाते, पु ल देशपांडे कला अकादमी आनी मुंबयच्या स्मित हरी प्रॉडक्शन हांच्या जोड पालवान नाट्य एकता संमेलनाच्या निमतान ह्या नाट्य प्रयोगाचें आयोजन केल्लें. ह्या नाटकांत भालचंद्र उसगावकार (अप्पा), नम्रता गडेकार (कावेरी), हरीष अडकोणकार ( सुधाकर ), आर्या आमोणकार ( शारदा ), सिद्धार्थ मडकयकार (नंदा ),अस्मिता नायक ( नलू) महेंद्र बांदोडकार (विठोबा), तेजस्विनी कट्टीकार (ठमी ), लतिकेश नायक (राजा), चिदानंद मडकयकार (आसाराम), हनुमंत आजगांवकार ( कळवणकर आनी इन्स्पेक्टर), दादु पार्सेकार आनी रुपेश शिरगांवकार ह्या कलाकारांनी भूमिका केल्यो. अविनाश पुर्खे ( सहाय्य्क दिग्दर्शन), सत्यवान शिलकार, ( आवाजा येवजण)स खेमराज पिळगांवकार (नेपथ्य ), जयंत नाटेकार आनी प्रदीप गोवेकार (भेसवण), किशोर माशेलकार (उजवाडा येवजण) हांणी तंत्रीक बाजू सांबाळली.
मुंबय सारक्या शारांतल्या चोखंदळ प्रेक्षकां कडल्यान नाट्य प्रयोगाक बरो प्रतिसाद मेळ्ळो. गोंयांतल्या कलाकारांनी शिरवाडकर हांचे प्रतिभेंतल्यान साकार जाल्लें नटसम्राट सारकें नाटक सादर करून मुंबयकार प्रेक्षकां कडल्यान शाबासकी मेळयली हें आमचे खातीर उमेद वाडोवपी आसा, अशें साई पूर्वा आर्ट्साचो नाट्य निर्मातो अशोक कुंकळकारान सांगलें. कला आनी संस्कृती खातें आनी कला आनी संस्कृती मंत्री गोविंद गावडे हाचे ताणे उपकार मानल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
