सां फ्रान्सीस झेवियर पवित्र कुड दर्शन सुवाळ्याची 98 टक्के तयारी पुराय

भांगरभूंय | प्रतिनिधी

मुख्यमंत्री डॉ. सावंत हांणी दिली म्हायती

पणजी ः सां फ्रान्सीस झेवियर पवित्र कुड दर्शन सुवाळ्या वेळार सीसीटीव्ही कॅमेऱ्या वरवीं पुराय वाठाराचेर पुलीस नदर दवरतलें. ह्या वेळार कसलीय हालचाल दुबावीत दिसल्यार संबंदीत व्यक्तींक पुलीस ताब्यांत घेवन कारवाय करतले, अशें मुख्यमंत्री डॉ. प्रमोद सावंत हांणी स्पश्ट केलें.
झेवियर पवित्र कुड दर्शन सुवाळो 21 नोव्हेंबर ते 5 जानेवारी 2025 मेरेन पोरणें गोंय इगर्जेच्या आवारांत जातलो. ह्या सुवाळ्याची 98 टक्के तयारी पुराय जाल्या. भक्तांक तशेंच सामान्य लोकांक गरजेच्यो सगळ्यो सुविधा उपलब्ध केल्यात. सुवाळ्याचे तयारेचो नियाळ घेतले उपरांत डॉ. सावंत हांणी पत्रकार परिशदेंत ही म्हायती दिली.
परिशदेंत कायदो मंत्री आलेक्स सिक्वेरा, येरादारी मंत्री मॉवीन गुदिन्हो, कुंभारजुवेंचे आमदार राजेश फळदेसाय, आयोजन समितीचे संघटक संदीप जॅकीस आनी हेर अधिकारी हाजीर आशिल्ले.

सुवाळ्या वेळार वाठारांत सुरक्षे खातीर 700 आनी येरादारी वेवस्थापन खातीर 600 मेळून 1300 पुलिसांची वेवस्था आसतली. पुलीस निरिक्षका वांगडा पूर्णवेळ पुलीस उपअधीक्षकांची वेवस्था करतले. भक्तांक पिवपाचें उदक, शौचालय, रेस्ट रुम, दिका दाखोवपाचे बोर्ड, पार्किंगांतल्यान इगर्जेंत वचपा खातीर खाशेलीं वाहनां (बोगी) हांची वेवस्था आसतली. रस्त्यांचीं सगळीं कामां पुराय जाल्यांत. रायबंदर ते पोरणें गोंय रस्तो फाल्यां पुराय जातलो.
सुवाळ्याक हेर राज्यां सयत परदेशांतल्यान भक्त येतात. तांकां रावपा खातीर पिल्ग्रिमेज विलेजाची खासा वेवस्था केल्या. अंदूं पयलेच खेपे अशा प्रकारची वेवस्था केल्या. ज्येश्ठ नागरीक आनी दिव्यांगा खातीर खाशेली वेवस्था आसतली. 27 डिसेंबराक लायट आनी म्युझिक शो जातलो. जो अंदूंच्या कार्यावळीचें खाशेलें आकर्शण आसतलें.
पणजे सावन पोरणें गोंय मेरेन कदंब बशीची वेवस्था आसतली. हाचे भायर मडगांव, फोंडें, वास्को, म्हापशें सावन खास कदंब बशीची वेवस्था आसतली. बेगीनूच बस वेवस्थेचे वेळापत्रक जाहीर करतले अशें मुख्यमंत्र्यान सांगलें.
अंदूंचो पवित्र कुड दर्शन सुवाळो वेगळो आनी सगळ्यांत बरो आयोजीत सुवाळो आसतलो. खंयच्याय प्रकारचो आंतरराश्ट्रीय सुवाळो गोंयांत घडोवन हाडप शक्य आसा, तें ह्या पवित्र कुड दर्शन सुवाळ्यांतल्यान सिद्ध जातलें.
21 नोव्हेंबराक सकाळीं 9.30 वरांचेर प्रार्थना करून सुवाळ्याक सुरवात जातली. उक्तावण सुवाळ्याक कोणाकूच इग्रर्जे वतीन आपोवंक ना. पयले प्रार्थना सभे उपरांत सां फ्रान्सिस झेवियराची पवित्र कूड दर्शना खातीर बॅसिलिका इगर्जेंतल्यान सें कॅथेड्रल इगर्जेंत व्हरतले. 3 डिसेंबराक जावपी फेस्ताक मुख्यमंत्री आनी हेर मानेस्तांक आपयल्यात अशी म्हायती फादर हेन्री फाल्काव हांणी दिली.