भांगरभूंय | प्रतिनिधी
शांतताय, भावपण, एकवटा खातीर थळाव्या लोकांचो उपक्रम
भांगरभूंय । प्रतिनिधी
मडगांवः सां जुझे दी अरियाल गांवांत थळाव्या लोकांनी गांवची शांतताय, भावपण आनी एकवट तिगोवन उरचो हे खातीर मेणवात फेरी काडली.
गांवांत फाटल्या कांय दिसांनी खूबळ्यो घडामोडी घडल्यो. ज्यो गजाली जावपाक जाय नाशिल्ल्यो त्यो जाल्यो. गांवांतली शांतिकाय ना जाल्या. ही मेणवात फेरी एकामेकांचें भावपण आनी एकवट तिगून उरचो हे खातीर काडटात. खंयच्याच मनीस वा कोणाच्याच विरोधांत ती ना, अशें आमदार क्रूझ सिल्वा हांणी सांगलें.
बेनाभाट सां जुझे दी अरियाल वाठारांत शिवजयंती दिसा बेकायदो तरेन पुतळो उबारिल्ल्याचो दावो करून थळाव्या लोकांनी मंत्र्याची वाट आडायिल्ली. तशेंच तांचेर माती आनी गुंडें मारिल्ले. ह्या प्रकारा उपरांत मायणा कुडतरी पुलिसांनी 20 जाणां सयत हेरांचेर गुन्यांव नोंद केल्यात. गांवांतल्या ह्या घडणुकांक लागून पाद्रीभाट मैदानाचेर बिरेस्तारा सांजे वेळार थळावे लोक एकठांय जमपाचो उलो मारिल्लो. आमदार क्रूझ सिल्वा हांचे सयत लोकांनी मैदानार गर्दी केल्ली. ह्या वेळार फा. दामासिन्हो कार्व्हावो हांणी सांगलें, मनशाक जीण जियेवपाक सगळ्यो गजाली मेळ्ळ्यो, पूण शांती मेळूंक ना जाल्यार कसलोच फायदो ना. जियेतना भावपण, एकवट, मोग, सोशिकसाण, दया ह्यो गजाली नासल्यार जिणेक अर्थ ना. दुसऱ्यां कडेन मोगान वागपी मनशांकूच मनीसपण आसता, अशें म्हणटात. हें मनीसपण आनी शांतिकाय गांवांत तशेंच सरभोंवतणी जाय. शांतिकाय जाय हेच खातीर ही मेणवात मिरवणूक काडटात. ती कोणाच्या विरोधांत ना, जाल्यार गांवांतल्या लोकांचें एकवटीतपण वाडोवपाचो यत्न आसा, अशें तांणी सांगलें.
अजुनूय पुतळ्याक पुलीस संरक्षण
बेनाभाट सां जुझे दी अरियाल गांवांत खाजगी जमनीर छत्रपती शिवरायांचो पुतळो उबारला. हें बांदकाम आनी पुतळो उबारपा खातीर कसलीच परवानगी घेवंक नाशिल्ल्याचें सांगून गांवच्या लोकांनी ताका विरोध केलो. हे फाटभुंयेर फाटल्या चार दीस बेनाभाट वाठारांत उबारिल्ल्या शिवरायांच्या पुतळ्याच्या संरक्षणा खातीर पुलीस बंदोबस्त दवरला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
